Xalq artisti Vaqif Mustafayev “Qızıl orden”ə layiq görülüb

Görkəmli rejissor, Azərbaycanın Xalq artisti Vaqif Mustafayev Ümumdünya Jurnalistlər İttifaqı Konfederasiyası, Avropa Televiziya və Radio Akademiyası və Ukraynanın KİV Assosiasiyasının “Qızıl orden”inə layiq görülüb. Azərbaycan kinorejissoru Çingiz Aytmatov və Oljas Süleymenovdan sonra bu mükafatla təltif olunan üçüncü şəxsdir.

Ümumdünya Jurnalistlər İttifaqı Konfederasiyasının sədri Viktor Petrenko deyib ki, Vaqif Mustafayev telejurnalistika sahəsində xidmətlərinə görə bu ordenə layiq görülüb. O, Vaqif Mustafayevin “Space” telekanalının rəhbəri kimi fəaliyyətini yüksək qiymətləndirib, kinorejissorun ulu öndər Heydər Əliyev haqqında sənədli filmlərini isə müasir telejurnalistikada tapıntı kimi dəyərləndirib.

Qeyd edək ki, Vaqif Mustafayev bu il Serbiyada “Dünya kino incəsənətinə töhfə” mükafatına layiq görülüb. Məşhur italyan rejissoru Bernardo Bertoluççi Vaqif Mustafayevin “Yaramaz” bədii filmini dünyanın ən yaxşı 35 filmi sırasına aid edib. Sənətkar kino sənətinin inkişafında xidmətlərinə görə Azərbaycan Respublikasının «Şöhrət» və Gürcüstanın «Şərəf» ordenləri ilə təltif olunub.

Mədəniyyət.- 2013.- 28 avqust.- S. 4.