İtaliya agentliyinin saytında çövkənin UNESCO siyahısına daxil edilməsi barədə məqalə

İtaliyanın “TMNews” xəbər agentliyinin saytında Azərbaycan tərəfin təqdimatı ilə ənənəvi çövkən oyununun UNESCO-nun “Təcili qorunmaya ehtiyacı olan qeyri-maddi mədəni irs Siyahısı”na daxil edilməsi ilə bağlı məqalə yerləşdirilib.

Məqalədə çövkən oyunu barədə məlumat verilib. Qeyd edilib ki, ənənəvi Qarabağ atüstü oyunu olan çövkən iki komanda arasında çəmənlikdə oynanılır. At üstündə olan milli geyimli oyunçular musiqi sədaları altında yarışırlar.

Yazıda müəllif bildirib ki, UNESCO-nun bəyanatında da vurğulandığı kimi, urbanizasiya və miqrasiya prosesləri nəticəsində gənclər arasında çövkən oyununa maraq azalıb. Bu, çövkənlə məşğul olanların sayına da mənfi təsir göstərib.

Məqalədə həmçinin Ermənistan-Azərbaycan, Dağlıq Qarabağ münaqişəsi barədə də məlumat verilib. Diqqətə çatdırılıb ki, münaqişə nəticəsində Azərbaycan ərazisi Ermənistan silahlı qüvvələri tərəfindən işğal olunub. Tərəflər arasında atəşkəsə dair razılıq əldə edilsə də, cəbhə xəttində tez-tez silah səsləri eşidilməkdədir.

Mədəniyyət.- 2013.- 11 dekabr.- S. 4.