“Qədim Qafqaz
Albaniyasının izləri”
Qəbələ, Oğuz və Şəkiyə ikigünlük infotur zəngin təəssüratla yadda qaldı
Dekabrın 14-15-də
Mədəniyyət və Turizm Nazirliyinin dəstəyi, «A la
Carte Travel» və «Gilan turizm» şirkətlərinin təşkilatçılığı
ilə Qəbələ-Oğuz-Şəki marşrutu üzrə
infotur gerçəkləşdi. “Qədim Qafqaz
Albaniyasının izləri” adlı turda 34 turizm şirkəti
və 16 media nümayəndəsi yer almışdı.
İştirakçıları Mədəniyyət və
Turizm Nazirliyinin mətbuat katibi Zöhrə Əliyeva,
nazirliyin Daxili turizmin inkişafı sektorunun müdiri Mahir Qəhrəmanov,
sektorun əməkdaşı Cəmil Kəlbəliyev, «A
la Carte Travel»in direktoru Nəsib Usubov və «Gilan turizm»in rəhbəri
Həsən Həsənov müşayiət edirdi.
Səfərimiz «Qafqaz Baku City Hotel»dən başladı. Bakıdan 225 km məsafədə yerləşən Qəbələyədək bələdçimiz, Azərbaycan Turizm İnstitutunun müəllimi Tofik İmanov bizi yolumuzun üzərində yerləşən tarixi məkanlar, abidələr barədə məlumatlandırırdı. İxtisasca tarixçi olan Tofik müəllimlə birlikdə «Qədim Qafqaz Albaniyasının izləri» ilə Azərbaycan tarixinə qısa ekskurs etdik.
Bələdçimiz deyir ki, əlverişli coğrafi mövqeyə malik Azərbaycan həmişə böyük dövlətlərin diqqət mərkəzində olub, çoxsaylı istilalara məruz qalıb. Bununla yanaşı, zaman-zaman Azərbaycan ərazisində Qafqaz və Yaxın Asiyanın tarixinə təsir göstərmiş mühüm dövlətlər yaranıb. Onlardan biri də eramızdan əvvəl IV əsrdən eramızın VII əsrinədək mövcud olmuş Qafqaz Albaniyası olub: “Bu turun əsas məqsədi də Azərbaycan ərazisində min ilə yaxın mövcud olmuş və izləri bu günədək gəlib çıxmış Qafqaz Albaniyasının tarixi irsinin əsas məqamlarına diqqəti cəmləşdirməkdir».
«Qafqaz
Karvansaray Hotel» orta əsr memarlığını
xatırladır
Günortaya yaxın «Qafqaz Yeddi Gözəl» hotelinə
çatırıq. Hotelin qeydiyyat üzrə nəzarətçisi
Xaqani Hüseynov bizə məlumat verərək bildirir ki,
«Qafqaz Yeddi Gözəl» hoteli 2013-cü ildən fəaliyyət
göstərir. 55 nömrədən ibarətdir.
«Gilan Holdinq» sisteminə daxil olan hotel, hələlik
3 ulduz kateqoriyalı olsa da, gələcəkdə xidmətləri
genişləndirib daha yüksək ulduz dərəcəsi
almaq niyyətindədir.
«Qafqaz
Yeddi Gözəl» hoteli ilə qısa tanışlıqdan
sonra Qəbələ şəhərinin mərkəzindən
5 dəqiqəlik məsafədə yerləşən «Qafqaz
Karvansaray Hotel»inə tərəf istiqamət
götürürük. Xarici
görünüşünə görə orta əsr
memarlıq abidələrini xatırladan hotelin interyeri
müasir art-deko üslubunda dizayn edilib. Hotel
ümumilikdə 18000 kvadratmetr ərazini əhatə edir.
2013-cü ildə fəaliyyətə
başlayan «Qafqaz Karvansaray Hotel»in
açılışında Prezident İlham Əliyev
iştirak edib. Hotel Qəbələ Beynəlxalq
Hava Limanından 20 km məsafədə yerləşir.
Burada qonaqların istirahəti üçün hər
bir şərait yaradılıb. Ümumilikdə 159 nömrədən
ibarət hotelin bütün otaqlarında mini bar, seyf, telefon,
kabelsiz internet, peyk TV kanallar, fen, istilik sistemi və 24
saatlıq xidmət mövcuddur. Hoteldə
qalanlar SPA və sağlamlıq mərkəzi, buxar hamamı,
masaj otaqları və qapalı hovuzdan istifadə edə bilərlər.
Qonaqlara Azərbaycan və dünya mətbəxinə
aid yeməklər təklif olunur.
Nic
tolerantlığın kiçik modelidir
Səfərimizin
birinci günü tanış olduğumuz
məkanlardan biri də Qəbələ rayonunun Nic qəsəbəsində
yerləşən qədim alban məbədi - Çotari kilsəsi
oldu. Nic (udin dilində mənası su, bulaq deməkdir)
Qəbələnin ən böyük yaşayış məskənlərindən
biridir. Kəndin 10 min nəfərə
yaxın sakini var. Onlardan 3700 nəfəri udinlərdir. Onlar öz dilini, dinini, adət-ənənələrini
2500 ildir ki, qoruyub saxlayırlar. Udinlər
vaxtilə Qafqaz Albaniyasının 26 tayfasından biri olub.
Dünyada hazırda 6 mindən artıq udin var.
Azərbaycanda onların sayı 4 min nəfərdir. Rusiya, Ukrayna, Belarus, Qazaxıstan və
Gürcüstanda bu qədim xalqın nümayəndələrinə
rast gəlmək mümkündür.
Nic qəsəbə icra nümayəndəsi Vidadi
Mahmudovun bildirdiyinə görə, qədim alban abidəsi olan
Çotari kilsəsi 1723-cü ildə, yerli sakinlərin
yaşadığı 4 məhəllənin camaatı tərəfindən
tikilib. Kilsənin həyətində bunun simvolu olaraq əkilən
4 çinar ağacı günümüzədək gəlib
çıxıb. Kilsədə
keşiş yoxdur, icma tərəfindən idarə olunur.
2003-cü ildə kilsənin təmirinə
başlanıb, 2006-cı ildə yekunlaşdırılıb.
Vidadi
Mahmudov deyir ki, Azərbaycan dövləti tərəfindən
udinlərin öz dilini, mədəniyyətini, adət-ənənələrini
qoruması üçün hər bir şərait
yaradılıb: «2013-cü ilin oktyabr ayında Nicdə
xristianlığın 1700 illiyi ilə bağlı
böyük bir tədbir keçirildi. Qəsəbədə
fəaliyyət göstərən orta məktəbdə
uşaqlara 4-cü sinfə qədər udin dili dərsi
keçilir. Udin əlifbası 52 hərfdən
ibarətdir. Məlumat üçün
bildirim ki, Gürcüstanda yaşayan udinlər demək olar
ki, tamamilə gürcüləşdirilib. Nic qəsəbəsi isə Azərbaycanda
tolerantlığın kiçik bir modelidir. Burada müxtəlif xalqlar bir-biri ilə çox
mehriban yaşayır. Onlar bayramları
birlikdə qeyd edirlər, bir-birinin toyunda, yasında iştirak
edirlər, qız alıb-verirlər».
Qədim
Qəbələ şəhərinin qalıqlarından muzey
yaradılıb
Nic qəsəbəsi ilə tanışlıqdan sonra
qrupumuz Qəbələdən 20 km məsafədə yerləşən
qədim Qəbələ şəhər yerinə yola
düşür. Qəbələ Dövlət Tarix-Bədii
Qoruğunun ərazisində yerləşən bu məkanda
arxeoloji tapıntılar əsasında muzey yaradılıb.
Qoruğun əməkdaşı Mirazim Səmədovun
sözlərinə görə, eramızın I əsrinin
sonlarında xarici təhlükələrlə əlaqədar
Qəbələ şəhəri strateji cəhətdən
daha əlverişli olan, hazırda Səlbir və Qala adlanan əraziyə
köçürülüb. Bu ərazi
şəhərin əvvəlki yerindən təxminən 2 km
şimal-qərbdə, Qaraçay və Covurlu çayları
arasındakı şimal-cənub istiqamətində uzanan
yüksək yayladan ibarətdir. Qəbələnin
Qala və ya Covurqala adlanan hissəsi 12 hektar sahəni əhatə
edir. Qala şimaldan xəndəklə, cənubdan
orta əsrlərə aid möhtəşəm qala
divarları ilə əhatələnib.
Qala ərazisində əsaslı arxeoloji
qazıntılara 1961-ci ildən başlanıb. Qədim Qəbələ
şəhərinin ərazisi 50 hektar, şəhər qala divarlarının
uzunluğu 14 km olub. Hazırda onun az
bir hissəsi arxeoloji qazıntılar nəticəsində
üzə çıxarılıb.
Qala ərazisində 2008-ci ildən başlayaraq əsaslı
arxeoloji qazıntılar SEBA (Seul-Bakı) Azərbaycan-Koreya Mədəniyyət
Mübadiləsi Assosiasiyasının təşəbbüsü,
təşkilatçılığı, maliyyə dəstəyi
ilə aparılır. Qazıntılar zamanı şəhərin
antik dövr və orta əsrlərə dair qiymətli maddi-mədəniyyət
nümunələri aşkar edilib. 2008-2011-ci
illərdəki son araşdırmalar zamanı şəhərin
qala qapılarından biri, gözətçi məntəqəsi
və ona aid olan əşyalar aşkar edilib.
Qəbələ
Tarix-Diyarşünaslıq Muzeyini üç ölkənin
prezidenti ziyarət edib
Səfərimizin ilk günü son ziyarət etdiyimiz məkan
Qəbələ Rayon Tarix-Diyarşünaslıq Muzeyi oldu. 1980-ci ildən fəaliyyət
göstərən muzeyin əsas fondunda Qəbələnin və
Azərbaycanın 2500 illik tarixini əks etdirən 14 minə
yaxın eksponat mühafizə olunur. 13 bölmədən
ibarət muzeydə arxeoloji, etnoqrafik materiallar, xalq sənəti
nümunələri, qədim əlyazma və çap
kitabları var. Muzeyin həyətində açıq səma
altında daş abidələrdən ibarət sərgi
yaradılıb, daşyonma sənəti nümayiş
etdirilir. Buradakı abidələrin tarixi
eramızdan əvvəlki dövrlərə gedib
çıxır. Üstündə
yazı olan daşlar X-XV əsrlərə aiddir.
Bu barədə
bizə ətraflı məlumat verən direktor Xalis Məmmədov
onu da bildirdi ki, muzeyi indiyə qədər üç ölkənin
prezidenti ziyarət edib: «Azərbaycan Prezidenti İlham
Əliyev, Latviyanın dövlət başçısı
Valtis Zatlers və Qırğızıstan Prezidenti Roza
Otunbayeva muzeyimizdə olub. Muzeyin iki filialı fəaliyyət
göstərir. Ümumilikdə muzeyi ildə
20 minə yaxın insan ziyarət edir. Bunların
arasında xarici ölkə vətəndaşları
üstünlük təşkil edir. Qəbələdə
keçirilən beynəlxalq tədbirlər də bu saya təsir
göstərir».
Əsas hədəf
turistləri bölgələrimizə cəlb etməkdir
Qəbələnin tarixi məkanları və abidələri
ilə tanışlığı yekunlaşdırıb
infotur təşkilatçılarının «Qafqaz Sport»
hotelində təşkil etdiyi mətbuat konfransına
qatıldıq. Tədbirdə çıxış edən Mədəniyyət
və Turizm Nazirliyi Daxili turizmin inkişafı sektorunun
müdiri Mahir Qəhrəmanov bölgələrimizdə
turizmin inkişafı ilə bağlı görülən
işlərdən danışdı: “Nazirlik bölgələrimizin
turizm imkanlarının turizm şirkətləri tərəfindən
turpaket şəklində xarici turistlərə təqdim
olunması istiqamətində bir çox işlər
görür. «Qədim Qafqaz Albaniyasının
izləri» marşrutu üzrə infotur da bu məqsədə
xidmət edir. Məqsədimiz şimal-qərb
bölgəsində yerləşən alban abidələri,
tarix-mədəniyyət yadigarları, turizm-nümayiş
obyektləri, eləcə də “Gilan Holdinq”in bölgədə
yeni açılan və yüksək standartlara uyğun xidmət
göstərən «Qafqaz» hotelləri ilə
tanışlıqdır. Turizm şirkətlərinin
bütün bunları görməsi, turpaket şəklində
hazırlayıb təqdim etməsi vacibdir».
Sektor
müdiri bildirdi ki, Mədəniyyət və Turizm Nazirliyinin əsas
hədəfi regionlarımızı tanıtmaq, müxtəlif
turist marşrutları yaratmaqla turistləri bölgələrimizə
cəlb etməkdir: «Turizm şirkətlərinə də bu
istiqamətdə fəal olmağı, yeni marşrut təklifləri
ilə bizə müraciət etməyi tövsiyə edirəm.
Bu istiqamətdə onların hər hansı bir
layihələri nazirlik tərəfindən dəstəklənəcək».
«Qafqaz» Azərbaycanı
dünyada tanıdacaq hotel brendidir
«Qafqaz
Riverside Resort» və «Qafqaz Resort» mehmanxanalarının ön
büro müdiri Süleyman Məmmədov «Qafqaz» brendi ilə
tanınan mehmanxanalar haqqında məlumat verdi.
Qeyd etdi ki, «Gilan Turizm»in hotelləri 2008-ci ildən fəaliyyət
göstərir: “Həmin il ilk beşulduzlu «Qafqaz Resort» hoteli
açıldı. 2010-cu ildə «Qafqaz Riverside», 2011-ci ildə
«Qafqaz Sport», ardınca «Qafqaz Qəbələ City», «Qafqaz Yeddi
Gözəl» və bu ilin oktyabr ayında «Qafqaz Karvansaray
Hotel»in açılışı oldu. Ümumilikdə
«Qafqaz» brendinə daxil olan Bakıda 3, Qəbələdə
6, Lənkəranda 1 hotel fəaliyyət göstərir. Qəbələdəki hotellərin 3-ü
beşulduzlu, 1-i dördulduzlu, 2-si isə 3 ulduzludur.
Layihələrimiz davam edir. Gələcəkdə
xarici ölkələrdə də bu brendə daxil olan hotellər
qurmaq niyyətindəyik. Hazırda bu istiqamətdə
Baltikyanı ölkələrdə və Gürcüstanda
iş gedir. «Qafqaz» hotellərini qurmaqda məqsədimiz
Azərbaycanın ilk hotel brendini yaratmaqdır. İnanırıq ki, gələcəkdə ölkəmizin
turizmini və Azərbaycan hotelçiliyini bu brend vasitəsilə
dünyada tanıda biləcəyik».
«A la Carte travel» şirkətinin direktoru Nəsib Usubov isə
təqdim olunan mədəni turizm marşrutunun mahiyyəti
haqqında danışdı. Onun sözlərinə
görə, marşrutun əsas məqsədi Azərbaycanın
qədim tarixə və köklü mədəniyyətə
malik bir ölkə olduğunu bütün dünyaya
tanıtmaqdır. «Qədim Qafqaz Albaniyasının izləri»
mədəni turizm marşrutu artıq iki ilə
yaxındır fəaliyyət göstərir: «Marşrutla
maraqlananlar çoxdur. Almaniyadan, Rusiyadan gələn
turistlərin əksəriyyəti bu marşrutla maraqlanır.
Bir çox tanınmış turizm
portallarında reklam veririk. Bu vaxta qədər
yalnız bizim şirkət vasitəsilə 300-dən
yuxarı xarici turist bu marşrutdan istifadə edib. Bütün marşrut boyu qonaqlarımızı istəklərindən
asılı olaraq alman, ingilis, fars, rus, türk, fransız və
italyan dilli bələdçilər müşayiət edir».
Şirkət direktoru qeyd etdi ki, «A la Carte travel»in təqdim
etdiyi digər bir mədəni turizm marşrutu «Beş dövr
- beş paytaxt» adlanır. Bakı-Şəki-Qəbələ-Gəncə-Bərdə-Bakı
istiqamətində reallaşdırılan bu marşrut tarixən
Azərbaycanın paytaxtları olan şəhərləri əhatə
edir: «Xaricilər bu marşrutu da çox sevir. Marşrutu
ötən yaydan istifadəyə vermişik. Azərbaycanda yol infrastrukturu elə inkişaf edib ki,
artıq bütün bölgələrimizi əhatə edən
marşrutlar təklif etməkdə heç bir çətinliklə
qarşılaşmırıq. Bütün
istiqamətlərə rahat getmək mümkündür.
Marşrut yalnız xarici turistlər
üçün deyil, yerli sakinlər də istədikləri
zaman qrup şəklində bu marşrutla hərəkət edə
bilər. Daxili turlarla bağlı layihələrimiz
bundan sonra da davam edəcək. Biz
uşaqlarımızı elə tərbiyə etməliyik ki,
tariximizi dərindən öyrənə bilsinlər. Çünki onlar tarixi bilmədən vətəni
sevə bilməzlər».
«Tufandağ»
qış-yay turizm kompleksində 5 min nəfər istirahət
edə biləcək
Səfərimizin ikinci günü Qəbələdə
inşa edilən «Tufandağ» qış-yay turizm istirahət
kompleksinə gəzinti ilə başladı. «Gilan Holdinq» Maliyyə-Sənaye
Qrupu tərəfindən həyata keçirilən layihədə
xizək və kanat yollarının tikintisini həyata
keçirən «Leitner» şirkətinin direktoru İlkər
Cumbul kompleks barədə iştirakçılara ətraflı
məlumat verdi. Qeyd etdi ki, kompleks Azərbaycanda
il boyu dağ turizmini inkişaf etdirmək,
yerli və xarici turistlərin yüksək səviyyəli
istirahətini təmin etmək məqsədilə
yaradılır. Burada turistlərə ilboyu kanat
gəzintisi, qış mövsümündə müxtəlif
mürəkkəb səviyyəli yollarda xizəklə
sürüşmə təlimi, xizəkçilik məktəbi,
iaşə xidməti (kafe, restoran), uşaq istirahət mərkəzi,
hotel (mehmanxana) və digər xidmətləri təklif ediləcək.
Kompleksin inşası 2 mərhələdən ibarətdir. 1-ci mərhələnin
inşasına 2012-ci ilin may ayında başlanıb, tamamlanması
2014-cü ilin oktyabr ayına planlaşdırılır. 2-ci mərhələnin
inşası 2014-cü ilin yazında başlayacaq: «Hazırda
birinci mərhələdə planlaşdırılan 4 kanat xətti
tam inşa edilib, 10 xizək yolundan 5-ində əsas inşaat
işləri başa çatıb. Bu
qış mövsümündə kanat xətlərində gəzinti,
hazır olan yollarda xizəklə sürüşmək, xizəklə
sürüşmə təlimi, iaşə xidmətləri həyata
keçiriləcək.
Kanat xətləri «Qafqaz Riverside Hotel»dən
başlayır. 1-ci kanat yolu 1650 metr hündürlüyə
qalxır. Digər yol isə Qəbələnin
Duruca kəndinə gedir. Kənddən
yuxarı qalxan yolun hündürlüyü 1950 metrdir. Xizək mərkəzində 15 xizək yolu var. Bu
yollar bütün istiqamətlərdə uzanır. Ən uzun xizək yolu 1950 metrdir. Xizək həvəskarları dolanıb getməklə
bu yolu 6 km-ə qədər uzada bilərlər. İki xizək yolunun yarışlar
üçün istifadəsinə dair hazırda Beynəlxalq
Xizək Federasiyası ilə danışıqlar
aparılır. Kanat yolla Duruca kəndindən
2565 metr hündürlükdə yerləşən Şimal təpəsinə
çıxmaq planlaşdırılır. Buradan şəlaləyə enmək
üçün digər bir kanat yolu da inşa edilir. Xizək mərkəzi hər tərəfdən
dağlarla əhatələndiyinə görə istirahət
üçün çox əlverişlidir. Xizək sürmək vərdişlərinə yiyələnmək
üçün də ayrıca xizək yolu var. Bunun
üçün müxtəlif ölkələrdən
mütəxəssislər dəvət ediləcək».
Şirkət təmsilçisi bildirdi ki, birinci mərhələ
istifadəyə verildikdən sonra 2 min nəfər buradakı
xidmətlərdən istifadə edə biləcək. İkinci mərhələ
yekunlaşandan sonra isə bu say 5 min nəfərə
çatacaq.
Kişdəki
alban abidəsini ildə 2 mindən çox insan ziyarət edir
Həmin
gün tanış olduğumuz daha bir məkan
Oğuz Tarix-Diyarşünaslıq Muzeyi oldu. Muzeyin direktoru
Adilə Xuduyeva bizi eksponatlar barədə məlumatlandırdı:
«Oğuzun çox unikal təbiəti, zəngin flora və
faunası var. Muzeyin ekspozisiyasının əsasını
Oğuz rayonunda aparılan qazıntılar zamanı
aşkarlanan maddi-mədəniyyət nümunələri,
milli geyimlər, kənd təsərrüfatı alətləri,
sənətkarlıq nümunələri, bitki və heyvanat aləmi
təşkil edir. Muzey 4 bölmədən - təbiət,
qədim dövr, sovet imperiyasının süqutu və
müasir dövr bölmələrindən ibarətdir. Muzeyin binası 1822-ci ildə inşa olunub. Bir nəfər udin babasının şərəfinə
tikdirib. Təsdiq olunmamış məlumatlara
görə, əvvəllər kilsə kimi istifadə olunub.
1981-ci ildə bərpa olunub, 90-cı illərdən
muzey binası kimi istifadə olunur».
«Qədim Qafqaz Albaniyasının izləri» ilə sonuncu
baş çəkdiyimiz məkan Şəkinin Kiş kəndi
ərazisində yerləşən qədim alban məbədi
oldu. Abidə barədə məlumatı bələdçi
Vüsalə Hüseynovadan alırıq. Onun
dediyinə görə, məbəd eramızın I əsrində
İsa peyğəmbərin həvarilərindən olan Yelisey
tərəfindən tikilib. 2000 yaşı olan məbədin
hündürlüyü 16 metr, divarlarının
qalınlığı 1 metrdir: «Qafqaz Albaniyasında geniş
yayılan Ay məbədinin özülü üzərində
qurulub. Əhəngdaşı və kirəc
tozu ilə tikilən bu abidə erkən orta əsrlərdə
yaranan ilk günbəzli, zal tipli məbəddir və
memarlıq abidəsi kimi dövlət tərəfindən
qorunur. 2000-ci ildə bərpası başa
çatdırılıb, 2003-cü ildən isə muzey kimi fəaliyyət
göstərir. Xüsusilə yay
aylarında muzeyin ziyarətçiləri çox olur. İl ərzində məbədi 2 min nəfərdən
çox insan ziyarət edir. Onların
arasında əcnəbilər də çoxdur. Azərbaycan, ingilis, rus, türk dillərində bələdçilər
turistlərə lazımi məlumatları
çatdırır».
Səfərimiz Şəkinin mərkəzində yerləşən
«İssam» hoteli ilə tanışlıqla yekunlaşdı. Hotelin baş
meneceri Səbuhi Ağaməmmədli bildirdi ki, burada
qonaqların hər bir rahatlığı təmin olunur.
Canlı musiqi, ləziz Azərbaycan mətbəxi,
qapalı hovuz, istilik sistemi ilə təmin olunmuş geniş
otaqlar və əlavə xidmətlər 24 saat qonaqların
ixtiyarındadır.
Fəxriyyə Abdullayeva
Mədəniyyət.- 2013.- 18
dekabr.- S. 7.