Daşkənddə Azərbaycan Mədəniyyəti və Ədəbiyyatı Mərkəzi

Daşkənddəki Heydər Əliyev adına Azərbaycan Mədəniyyət Mərkəzinin (AMM) təşəbbüsü ilə Nizami Gəncəvi adına Özbəkistan Dövlət Pedaqoji Universitetində Azərbaycan Mədəniyyəti və Ədəbiyyatı Mərkəzinin açılışı olub.

Tədbirdə Özbəkistan-Azərbaycan Dostluq Cəmiyyətinin rəhbərliyi, Azərbaycan Dövlət Rəsm Qalereyasının direktoru Elnur Hüseynov, ölkəmizin Özbəkistandakı səfirliyinin əməkdaşları, diasporumuzun üzvləri iştirak ediblər.

Mərkəzdə Azərbaycanın və Özbəkistanın dövlət bayraqları, ölkəmizin tarixi, ədəbiyyatı, mədəniyyəti, ulu öndər Heydər Əliyev, Azərbaycan Prezidenti İlham Əliyevin həyat və fəaliyyəti ilə bağlı müxtəlif kitablar, Azərbaycan xalçaları və qədim filmlərimiz, milli musiqilərimizdən ibarət disklər yer alıb. Arzu edənlərə kitab və disklər hədiyyə edilir.

Universitetin müəllimi, filologiya elmləri namizədi Gülbahar Aşurova, Özbəkistan-Azərbaycan Dostluq Cəmiyyətinin sədri, professor Şavkat Şaripov bildiriblər ki, mərkəz Özbəkistan və Azərbaycan mədəniyyəti, ədəbiyyatı və incəsənətini təbliğ edəcək. Mərkəzdə Azərbaycan dili kursları fəaliyyət göstərəcək və həftədə bir gün Azərbaycan filmləri nümayiş etdiriləcək.

AMM-in direktoru Samir Abbasov bu mərkəzin yaradılmasına göstərdikləri dəstəyə görə Azərbaycan Respublikasının Mədəniyyət və Turizm Nazirliyinə, ölkəmizin Özbəkistandakı səfirliyinə, Azərbaycan Dövlət Rəsm Qalereyasına minnətdarlığını bildirib.

Mədəniyyət.- 2013.- 20 dekabr.- S. 9.