Əməkdar artist İmamverdi Bağırovun xatirəsi yad edildi

Dekabrın 23-də Azərbaycan Teatr Xadimləri İttifaqında Əməkdar artist İmamverdi Bağırovun 100 illik yubileyi münasibətilə anma tədbiri keçirildi.

Tədbiri Azərbaycan Teatr Xadimləri İttifaqının sədri, Xalq artisti Azər Paşa Nemətov açaraq İmamverdi Bağırovun yaradıcılığından, işlədiyi teatrlarda gənclərə göstərdiyi diqqət və qayğıdan, yaratdığı maraqlı obrazlardan bəhs etdi. Bildirdi ki, aktyor sənət ömrünün böyük hissəsini Azərbaycan Dövlət Musiqili Komediya Teatrında keçirib. Bu teatrın səhnəsində dövrünün görkəmli aktyorları ilə tərəf-müqabil olaraq maraqlı obrazlar yaradıb. Aktyorun yaratdığı obrazlar və maraqlı xatirələr, sözsüz ki, onu könüllərdə yaşadır və yaşadacaq.

“Söz” jurnalının baş redaktoru, yazıçı-publisist Sevda Əlibəyli, tibb elmləri doktoru, professor Südeyf İmamverdiyev, filologiya elmləri doktoru Aqşin Babayev, Xalq artisti İlham Namiq Kamal, Salman Mümtaz adına Azərbaycan Dövlət Ədəbiyyat və İncəsənət Arxivinin direktoru Maarif Teymurov və başqaları çıxış edərək İmamverdi Bağırovun həyat yolundan, teatr sənətimizə verdiyi töhfələrdən danışdılar, sənətkarla bağlı xatirələrini bölüşdülər.

Qeyd olundu ki, İmamverdi Bağırov Akademik Milli Dram, Gənc Tamaşaçılar, İrəvan, Qazax, Quba və digər teatrlarda fəaliyyət göstərsə də, sonradan taleyini Musiqili Komediya Teatrına bağlayıb. İmamverdi Bağırov həm də teatr sənətinə məsuliyyətlə yanaşan, gənc kadrlara qayğı göstərən sənətkarlardan idi. Satirik çalarlı, sosial-ictimai mahiyyətli personajların istedadlı ifaçılarından sayılan aktyor “Keto və Kote”də tacir Makar, “Ev bizim, sirr bizim”də Aslanlı, “Özümüz bilərik”də Bəbirli, “Qonşumuzda bir oğlan var”da raykom katibi, “Toy kimindir?”də professor, “Hacı Qara”da Dərviş, “Ulduz”da Möhsün və digər yaddaqalan obrazlar yaradıb.

Sonda çıxış edən sənətkarın qızı, Bakı Dövlət Universitetinin dosenti Xanım Məmmədova tədbirin təşkilində əməyi olanlara ailələri adından minnətdarlığını bildirdi.

Savalan Fərəcov

Mədəniyyət.- 2013.- 25 dekabr.- S. 4.