Yazıçılar Birliyinin yeni saytı təqdim olunub

Dekabrın 25-də Azərbaycan Yazıçılar Birliyinin (AYB) “Natəvan” klubunda “Mətbuat və ədəbiyyat” mövzusunda dəyirmi masa keçirilib. Tədbirdə kütləvi informasiya vasitələrində mədəniyyət xəbərlərinin, ədəbi-bədii prosesin işıqlandırılması vəziyyəti müzakirə edilib.

Bildirilib ki, bu gün qəzet, sayt və portallarda, telekanallarda Azərbaycan ədəbiyyatının araşdırılmasına, təbliğinə lazımi diqqət göstərilmir. Bunun da başlıca səbəblərindən biri ədəbi resurslardan lazımi səviyyədə istifadə edilməməsidir. Bu istiqamətdə boşluğu aradan qaldırmaq məqsədilə Yazıçılar Birliyinin www.ayb.az ünvanlı yeni saytı hazırlanıb.

Vurğulanıb ki, AYB-nin rəsmi saytının (www.azyb.net) olmasına baxmayaraq yeni yaradılan sayt daha səmərəli fəaliyyət göstərməklə yanaşı, həm də hər bir yaradıcı insan üçün açıq olacaq.

İnteraktiv sayt yazıçı və şairlərin əsərlərinin geniş təbliği və oxucu kütləsinə çatdırılmasında mühüm rol oynayacaq. Saytda 10-a yaxın bölmə var, internet resurs daim yenilənəcək və dünya ədəbiyyatının Azərbaycan oxucularına çatdırılmasına xidmət edəcək.

Mədəniyyət.- 2013.-29 dekabr.- S. 13.