Dənizkənarı Milli Parkın Yeni il yenilikləri

Son illər sürətli inkişafı, möhtəşəm tikililəri, gözoxşayan parkları, küçə və meydanları ilə dünyanın ən gözəl şəhərləri ilə bir sırada yer alan Bakı da 2014-cü ili məxsusi görkəmdə, bayram libasında qarşılayır.

Bayram libası şəhərin əvəzsiz incilərindən sayılan, Bakının son 100 illik tarixini özündə yaşadan, onun müasir simasını təşkil edən Dənizkənarı Milli Parkda daha çox diqqəti cəlb edir. Bakı sakinlərinin, eləcə də paytaxtımızın qonaqlarının sevimli istirahət yeri olan bu məkan hər il olduğu kimi, bu dəfə də Yeni il münasibətilə xüsusi olaraq bəzədilir.

Dənizkənarı Bulvar İdarəsi bu il də Yeni il ərəfəsində şəhər sakinlərinin istirahət və əylənməsini təmin etmək məqsədilə dekabrın 28-dən yanvarın 2-dək gücləndirilmiş iş rejimində işləyəcək. Bulvarda Yeni ilin əsas atributlarından olan yolkalar - şam ağacları da əlvan rənglərə, çil-çırağa bürünüb.

İdarənin rəis müavini Nazim Məcidovun bildirdiyinə görə, bulvarda 10 şam ağacı bəzədilib. Paytaxtın ən hündür - 35 metrlik yolkası isə Azadlıq meydanında qurulub. Bu yolkanın hündürlüyü ötənilki ilə müqayisədə 14 metr çoxdur.

Bulvara gələnlər üçün maraqlı sürpriz də hazırlanıb. İdarə yeni aldığı gəzinti gəmisini dekabrın 28-də istifadəyə verib. 650 nəfərlik oturacaq yeri olan bu gəminin üstünlüyü ondan ibarətdir ki, gəzinti zamanı burada insanlara səyyar qida xidməti də göstəriləcək.

Mədəniyyət.- 2013.- 29 dekabr.- S. 14.