“İçərişəhər” beynəlxalq layihədə

 

   Yunanıstanın Bizans və Post Bizans Abidələri üzrə Avropa Mərkəzi “Qara dəniz hövzəsi transsərhəd əməkdaşlıq proqramı” çərçivəsində yeni layihəyə start verib.

  

   Avropa Birliyinin dəstək verdiyi “OLKAS: Egey dənizindən Qara dənizə qədər Şərq dəniz marşrutlarında orta əsr limanları” adlı layihə üzrə “İçərişəhər” Dövlət Tarix-Memarlıq Qoruğu İdarəsi assosiativ tərəfdaş seçilib. İdarədən verilən məlumata görə, layihədə Bolqarıstan, Rumıniya, Gürcüstan, Ukrayna, Türkiyə, Rusiya və Yunanıstanda fəaliyyət göstərən dövlət qurumları, tədqiqat institutları və muzeylər iştirak edirlər.

   Layihənin əsas məqsədi resursları birləşdirərək sosial-iqtisadi inkişaf üçün transsərhəd əməkdaşlığını dəstəkləmək, ortaq turizmin inkişafı sahəsində təşəbbüsləri genişləndirməklə turizm şəbəkəsi yaratmaqdır.

   2014-cü ilə qədər icra olunacaq layihə çərçivəsində partnyorlar üçün bir sıra fəaliyyətlərin, o cümlədən təlimlərin, seminarların, qarşılıqlı səfərlərin həyata keçirilməsi planlaşdırılır. Layihənin sonunda yaradılacaq “Qara dəniz hövzəsi ölkələrinin mədəni turizm şəbəkəsi” gələcək əməkdaşlıq üçün fəaliyyət proqramı hazırlayacaq.

   Xatırladaq ki, layihə çərçivəsində 15 dekabr - 15 yanvar tarixində Yunanıstanda Qara dəniz və ətraf coğrafiyada qədim zamanlarda mövcud olmuş və hazırda fəaliyyət göstərən 39 limanı (Saloniki şəhərindən Bakıya qədər) əks etdirən fotosərgi təşkil edilmişdi. Sərgidə Bakı limanını əks etdirən foto və rəsmlər də nümayiş olunub.

  

 

   Ceyhun

 

   Mədəniyyət.- 2013.- 8 fevral.- S. 6.