Dünya Mədəniyyətlərarası Dialoq Forumuna hazırlıq müzakirə olunub

2013-cü ilin 29 may - 1 iyun tarixində Bakıda II Dünya Mədəniyyətlərarası Dialoq Forumu keçiriləcək. Fevralın 12-də mədəniyyət və turizm naziri Əbülfəs Qarayevin sədrliyi ilə Forumun Təşkilat Komitəsinin iclası keçirilib.

İclasda çıxış edən Ə.Qarayev qeyd edib ki, Azərbaycan Respublikasının Prezidenti cənab İlham Əliyevin 2011-ci ilin 27 may tarixli Fərmanı ilə Dünya Mədəniyyətlərarası Dialoq Forumu iki ildən bir Azərbaycanda keçiriləcək. 2012-ci ilin 25 dekabr tarixində Azərbaycan Respublikası Prezidenti Administrasiyasının rəhbəri Ramiz Mehdiyevin sərəncamı ilə II Dünya Forumunun 2013-cü ilin 29 may - 1 iyun tarixində Bakıda təşkili ilə bağlı Tədbirlər Planı təsdiq edilib.

Tədbirin əhəmiyyətini vurğulayan nazir bildirib ki, Azərbaycan Prezidentinin himayəsi ilə keçirilən Forum UNESCO, BMT-nin Sivilizasiyalar Alyansı, BMT-nin Dünya Turizm Təşkilatı, Avropa Şurası, İSESCO, Avropa Şurasının birgə tərəfdaşlığıyla təşkil edilən yeganə platformadır. Forumda 800-1000 nəfər xarici qonağın iştirakı nəzərdə tutulur. Forum çərçivəsində 10-dan çox tədbir və ilk dəfə mədəniyyət və turizm nazirlərinin iştirakı ilə Şərq-Qərb Nazirlər Konfransı keçiriləcək.

İclasda mədəniyyət və turizm nazirinin müavini Sevda Məmmədəliyeva Forumun beynəlxalq işçi qrupunun fəaliyyəti və tərəfdaş qurumların təkliflərini diqqətə çatdırıb.

Nazirliyin Beynəlxalq əlaqələr və mədəniyyət proqramları şöbəsinin müdiri Vasif Eyvazzadə Foruma hazırlıq prosesi, tədbirin proqram və konsepsiyası barədə təqdimatla çıxış edib.

Forum zamanı maraqlı mədəni proqramın təşkilinin əhəmiyyətini qeyd edən nazir bütün tədbirlərdə xalqımızın mədəniyyətinin təbliğinin prioritet olmasını vurğulayıb. Nazirliyin eksperti Cahangir Səlimxanov mədəni proqramla bağlı təqdimatla çıxış edib.

Yekunda Ə.Qarayev nazirlik daxilində təşkilat komitəsi və işçi qrupların vəzifələr bölgüsünün müəyyən edilməsi, bütün aidiyyəti qurum və təşkilatlarla yaxından əməkdaşlıq barədə tapşırıqlar verib.

Mədəniyyət.- 2013.- 13 fevral.- S. 2.