Tacikistanla mədəni əməkdaşlıq müzakirə olundu

“Qarabağ” triosu “Şeş-məkam” festivalında çıxış edəcək

Azərbaycanın Tacikistandakı səfiri Abbasəli Həsənov bu ölkənin mədəniyyət naziri Mirzaşaxrux Asrori ilə görüşüb. Görüşdə ölkələrimiz arasında mədəni sahədə əlaqələrin dərinləşdirilməsində qarşılıqlı tədbirlərin əhəmiyyəti qeyd edilib.

Səfir 2013-cü ildə Xalq artisti Mənsum İbrahimovun rəhbərlik etdiyi “Qarabağ” triosunun Tacikistanda konsertinin, bu çərçivədə ustad dərslərinin keçirilməsinin nəzərdə tutulduğunu bildirib. İki ölkənin milli konservatoriyaları arasında əməkdaşlıq haqqında sazişin imzalanması da gündəlikdə duran məsələlərdəndir.

Səfir həmçinin aprel ayında azərbaycanlı musiqiçilər tərəfindən Tacikistan İncəsənət Universitetində orqan musiqisi konsertinin, bu çərçivədə ustad dərslərinin keçirilməsini təklif edib.

Səfir dahi bəstəkar Üzeyir Hacıbəylinin “Leyli və Məcnun” operasının Tacikistanda hər iki ölkə ifaçılarının iştirakı ilə S.Ayni adına Opera və Balet Teatrında səhnələşdirilməsini təklif edib. Düşənbədə Azərbaycan kino həftəsinin, aşıq musiqisi konsertinin təşkilinin mümkünlüyü vurğulanıb.

Nazir M.Asrori hər il mayın 22-nin Tacikistanda “Şeş-məkam” günü kimi qeyd olunduğunu, Tacikistanda bununla əlaqədar mayın 9-dan 13-dək festival-simpoziumun keçirilməsini nəzərə alaraq Mənsum İbrahimovun “Qarabağ” triosunun iştirakı ilə konsertin bu günlərdə təşkilinin məqsədəuyğunluğunu bildirib. O, Bakıda keçiriləcək muğam festivalı, gənc pianoçuların yarışması, Dünya Mədəniyyətlərarası Dialoq Forumunda iştirakla bağlı dəvət aldıqlarını, bu tədbirlərdə iştirak edəcəklərini deyib, ötənilki muğam yarışmasında Tacikistan təmsilçilərinin birinci və üçüncü yerləri tutmasını məmnuniyyətlə xatırlayıb.

Nazir Azərbaycanda dünya səviyyəsində tanınan çoxsaylı bəstəkarların olmasını nəzərə alaraq bu sahədə kadr hazırlanması üçün respublikamıza tələbələr göndərilməsinin məqsədəuyğunluğunu qeyd edib.

Mədəniyyət.- 2013.- 22 fevral.- S. 3.