Məşhəddə keçirilən sərgidə Azərbaycan bölməsi maraqla qarşılanıb

Məşhəd şəhərində İranda təhsil alan xarici tələbələr üçün VI beynəlxalq mədəniyyət festivalı təşkil edilib.

Sərgidə Azərbaycan Respublikasına aid bölmə böyük maraqla qarşılanıb. Tehran Universitetinin fars dili və ədəbiyyatı fakültəsinin magistratura pilləsində təhsil alan Səmra İsmayılzadə və Həzrətəli Məmmədov tərəfindən təşkil olunmuş bölmə Azərbaycanın dövlət bayrağı, Bakının müasir görünüşlərini əks etdirən əzəmətli fotoşəkillərlə bəzədilib. Bölmənin qurulmasında ölkəmizin İrandakı səfirliyi tərəfindən tələbələrimizə hərtərəfli yardım göstərilib. AzərTAc-ın İran nümayəndəliyi tərəfindən də verilmiş nəşrlər - Xocalı soyqırımına, Qarabağın tarixinə, Azərbaycan Respublikasının müasir inkişafına dair kitab və jurnallar, CD-lər, suvenirlər və digər vəsaitlər bölməni daha da zənginləşdirib.

Bölmədə yer alan vəsaitlərin əksəriyyəti ziyarətçilərə paylanılıb. Tədbir çərçivəsində magistratura təhsilini başa vuran tələbələrimizə İranın elm, tədqiqat və texnologiya naziri Kamran Daneşcu tərəfindən məzun diplomları təqdim edilib.

Mədəniyyət.- 2013.- 10 iyul.- S. 6.