Bakı işgüzar turizm
üçün geniş imkanlara malikdir
Rusiyalı qonaqlar paytaxtımıza səfərdən
məmnun qalıblar
Bu günlərdə Rusiya
Federasiyasının «UPJet Travel Group» və onun Azərbaycandakı
tərəfdaşı olan «Fun Travel» turizm şirkətlərinin
təşkilatçılığı ilə Bakıya
infotur təşkil edilib.
Səfər korporativ tədbirlərin
təşkili məqsədilə həyata keçirilib.
İnfoturda iştirak edən şirkətlər əsasən
MİCE (işgüzar) turizm sahəsində fəaliyyət
göstərirlər. Heyətə «UPJet» şirkətinin
korporativ müştəriləri, o cümlədən
farmakoloji, nəqliyyat fəaliyyəti ilə məşğul
olan şirkətlərin nümayəndələri daxildir.
1994-cü ildə yaradılan «UPJet
Travel Group» şirkətinin hazırda Moskva, Sankt-Peterburq, Kiyev,
Kişineu, İstanbul və Antalyada nümayəndəlikləri
fəaliyyət göstərir. Ümumilikdə isə şirkət
dünyanın 50-dən çox ölkəsində tədbirlər
təşkil edir. Bu barədə məlumat verən şirkətin
satış şöbəsinin müdiri Tatyana Konakova bildirdi
ki, ötən ildən başlayaraq Bakı şəhərinə
diqqət göstərməyə başlayıblar və burada
işgüzar tədbirlərin təşkili üçün
lazım olan imkanları araşdırıblar: «2012-ci ildə
Bakıya kiçik bir yoxlama aparmaq üçün bir
neçə qrup göndərdik. Etiraf edim ki, nəticə
bizi çox razı saldı. Bu dəfə Azərbaycandakı
tərəfdaşımız «Fun Travel» şirkətinin təklifləri
əsasında bizim korporativ müştərilərimizdən
ibarət bir qrup üçün Bakıya
dördgünlük infotur təşkil etmişik. Nümayəndələri
infoturda iştirak edən kompaniyalar artıq neçə illərdir
Ukrayna, Belarus və Qazaxıstanda böyük tədbirlər
təşkil edirlər. Açığı, indiyə qədər
belə bir fikir var ki, Bakı MİCE tədbirlərin
keçirilməsi üçün Rusiya şirkətinin tələblərinə
cavab verməyə hələ hazır deyil. Bu səfəri təşkil
etməkdə məqsədimiz belə fikirlərin
yanlış olduğunu sübut etmək, Bakıda son illər
yaradılan imkanları öz tərəfdaşlarımıza
göstərməkdir».
İnfotur iştirakçıları
arasında «EventPlatform» şirkətinin nümayəndəsi də
vardı. Şirkətin təmsilçisi Oleq Kryuçkovun
sözlərinə görə, «EventPlatform» geniş korporativ
tədbirlərin təşkilində müasir informasiya
texnologiyalarından istifadə üzrə ixtisaslaşıb:
«Biz interaktiv ekskursiyalar təşkil edirik. Bu zaman qrupların
müasir mobil vasitələrdən istifadəsini təşkil
edirik. Bundan əlavə, müxtəlif bayram şənlikləri,
konfrans və konqreslər təşkil keçiririk. Şirkətimizin
bir fəaliyyət istiqaməti də xidməti personalın təcrübəsinin
artırılması məqsədilə müxtəlif kurslar
təşkil etməkdir».
Şirkət təmsilçisi
bildirdi ki, infotur iştirakçıları üçün
İçərişəhərə qeyri-adi bir ekskursiya təşkil
ediblər: «Ekskursiya iştirakçıları əllərində
i-Pad vasitəsilə qədim şəhərin küçələrində
gəzərək şəhər sakinləri ilə
görüşməli, onlara suallar verməli idilər. Tur
boyu iştirakçıları bizim virtual talismanımız
müşayiət edirdi. Bunların hamısı videolentə
çəkilirdi. Bu videorolik axşam yeməyi zamanı
nümayiş olundu. Əvvəllər biz belə turları
dünyanın 20-dən artıq ölkəsində həyata
keçirmişik. İçərişəhər turu da
çox maraqlı alındı. İştirakçılar qədim
şəhər barədə, Azərbaycan paytaxtının
tarixi və mədəniyyəti haqqında ətraflı məlumat
əldə edə bildilər».
«Fun Travel» turizm şirkətinin təmsilçisi Fuad Rəsulov qeyd etdi ki, infoturun təşkilində onlara «JW Marriott Absheron», «Fairmont Baku» və «Jumeirah Bilgah Beach» hotelləri yaxından kömək edib. Nəticə olaraq infotur iştirakçıları Bakının MİCE turizmi üçün əlverişli şəraitə, müxtəlif tədbirlərin təşkili üçün imkanlara malik olması qənaətinə gəliblər: «Həmkarlarımız bildirdilər ki, Bakı MİCE turizmi üçün yeni bir istiqamətdir. Bir məqamı da nəzərinizə çatdırım ki, infoturu Azərbaycan Konqres Bürosunun yaradılmasına bir töhfə kimi də qiymətləndirmək olar. Çünki bu qurumun təsisçilərindən biri də bizim şirkətdir».
F.Abdullayeva
Mədəniyyət.- 2013.- 10 iyul.-
S. 9.