“Azərbaycan musiqi və rənglərdə”

Fransanın Kann şəhərində keçirilən Azərbaycanın mədəniyyət günləri yerli mətbuatda geniş işıqlandırılıb

Xəbər verdiyimiz kimi, iyulun 4-dən 7-dək Fransanın Kann şəhərində Heydər Əliyev Fondunun təşkilatçılığı ilə Azərbaycan mədəniyyəti günləri keçirilib. Avropanın kinematoqrafiya paytaxtı, kurort, festivallar və bayramlar şəhəri olan Kannda bu günlər yerli sakinlər və turistlərin yaddaşında Azərbaycanla qalıb. Ölkəmizin təbliği, Azərbaycan həqiqətlərinin Fransada tanıdılması məqsədilə ötən ilin payızından paytaxt Parislə yanaşı, 16 şəhərdə və regionda mədəniyyət layihəsi həyata keçirən Heydər Əliyev Fondu bu dəfə Kannda mədəniyyət, incəsənət və ənənələrimizi tanıdan möhtəşəm proqram təqdim etdi. İyulun 4-dən 7-dək lacivərd sahildə Azərbaycanı görmək, hiss etmək mümkün idi.

“Azərbaycan Kannda” mədəniyyət tədbirləri yerli mediada - “Le Figaro”, “Diapason”, “Nice-Matin”, “Le Cannois”, “BeauxArts” kimi nəşrlərdə, televiziya və radio kanallarında işıqlandırılıb.

“Rəngarəng işıqlar canlı musiqi ilə gözəl həmahənglik yaradırdı. Bununla Asiya və Avropa arasında yerləşən ölkəyə həsr edilmiş festival açıq elan olundu. Bu özünü təbliğ etməyin gözəl üslubudur” - “Nice-Matin” qəzeti Kannda ənənəvi olaraq keçirilən beynəlxalq “Pirotexnika sənəti” festivalında ilk dəfə təmsil olunan Azərbaycanın çıxışını belə təqdim edib.

“Pirotextika sənəti” festivalının açılışını edən Bakı atəşfəşanlıq qrupu “Azərbaycan musiqi və rənglərdə” şousu ilə səmada əsrarəngiz mənzərə yaradıb: “Bakı atəşfəşanlıq qrupu Azərbaycan bayrağının rənglərini canlandırdı. Mavi, qırmızı və yaşıl zolaqlı bayraq atəşfəşanlıqda yol göstərən ulduz kimi göründü”. Həmin gecə Qara Qarayevin “Yeddi gözəl” baletindən vals, Niyazinin “Rast” simfonik muğamı, Fikrət Əmirovun “Şur” simfonik muğamı atəşfəşanlığı müşayiət edərək Avropanın mərkəzində möhtəşəm gecə yaşadıb.

“Festivallar sarayının qarşısında quraşdırılmış Azərbaycana dair plakatları nəzərdən qaçırmaq mümkün deyil. Bu plakatlar Heydər Əliyev Fondu tərəfindən təşkil edilmiş “Qafqazın inciləri” adlı layihə ilə əlaqədar quraşdırılıb. Layihənin məqsədi hər bir kəsi Azərbaycan mədəniyyətinin özəllikləri ilə tanış etməkdir. Heydər Əliyev Fondu bütün Fransanı əhatə edən turdan sonra Azərbaycanın mədəni sərvətlərinin nümayiş məkanı Kann şəhəri oldu”, - deyə “Le Cannois” qəzeti “Azərbaycan şərəf duyar” başlıqlı məqalədə yazır.

“Diapason” jurnalı isə diqqəti muğam və Azərbaycan ritmlərinə çəkir: “Festivallar sarayı və ya Kruazett bulvarının səhnələrindəki silsilə tədbirlər bu ölkənin musiqi ənənələrinin üstünlüyü və zənginliyini təcəssüm etdirir. Bu ənənələr sırasında 2003-cü ildə UNESCO tərəfindən bəşəriyyətin qeyri-maddi irs siyahısına daxil edilən və ölkənin rəmzi sayılan muğam musiqisi də yer alıb. Bu musiqi XX əsrin əvvəllərində Azərbaycan klassik bəstəkarlar nəslini yetişdirdi. Üzeyir Hacıbəyli, Qara Qarayev, Fikrət Əmirov musiqilərini muğamın təsiri altında bəstələmişlər”.

Fransanın “BeauxArts” nəşrində də Azərbaycan mədəniyyətinin təqdimatına dair məqalə dərc olunub.

Mədəniyyət.- 2013.- 19 iyul.- S. 3.