Xalq artisti Ramiz Əzizbəylinin 65 illik yubileyi qeyd olunub

Cəfər Cabbarlı adına “Azərbaycanfilm” kinostudiyasında tanınmış aktyor və rejissor, Xalq artisti Ramiz Əzizbəylinin 65 illik yubileyi qeyd olunub. Tədbirdə çıxış edənlər sənətkarın yaradıcılığından söz açıb və ona xoş arzularını çatdırıblar.

Ramiz Əzizbəyli 1948-ci il iyulun 20-də Bakıda anadan olub. Azərbaycan Dövlət İncəsənət İnstitutunun mədəni-maarif fakültəsini bitirib. Uzun illərdir “Azərbaycanfilm” kinostudiyasında çalışır.

1987-ci ildə “Debüt” studiyasında çəkdiyi “Pirverdinin xoruzu” qısametrajlı bədii filmi ilə rejissorluq fəaliyyətinə başlayıb. Film bir neçə beynəlxalq kinofestivalda nümayiş olunub, Ukraynanın paytaxtı Kiyevdə keçirilən ümumittifaq festivalında rejissor debütünə görə mükafata layiq görülüb.

Ramiz Əzizbəyli 1991-ci ildə “Bəxt üzüyü” tammetrajlı bədii filmini çəkib. Film kinoteatrlarda nümayiş olunan ən baxımlı kassa filmi və yeni tariximizdə lentə alınmış ilk ən gəlirli kino işi kimi yadda qalıb, Daşkənddə keçirilən Asiya və Latın Amerikası ölkələrinin kinofestivalında xüsusi diplomla mükafatlandırılıb.

Xalq artistinin rejissoru olduğu “Yalan” bədii filmi Ermənistanın Azərbaycana qarşı hərbi təcavüzünün törətdiyi faciələrə həsr edilib.

Ramiz Əzizbəyli Mədəniyyət və İncəsənət Universitetinin professoru kimi yaradıcı gənclərin yetişməsinə öz töhfəsini verir. Hazırda səhhətində problemlər olan yubilyara möhkəm cansağlığı, yeni sənət sevincləri arzulayırıq.

Mədəniyyət.- 2013.- 24 iyul.- S. 5.