Azərbaycan turizminin canlı
ensiklopediyası idi
Sabir Rəhimov onu sevənlərin qəlbində
həmişə yaşayacaq
Azərbaycan turizm ictimaiyyəti
dəyərli nümayəndəsini
itirdi. Turizm üzrə mütəxəssis,
Azərbaycan Turizm və Ekskursiyalar Şurasının sədr
müavini Sabir Rəhimovun vəfatı çoxsaylı həmkarlarını,
tələbələrini və
müəllim yoldaşlarını,
eləcə də onu yaxından tanıyan media mənsublarını
sarsıtdı.
Bəlkə də çoxları
Sabir müəllimin ağır xəstəlikdən
əziyyət çəkdiyini
bilmirdi. Çünki ona zəng edəndə
həmişə gur və şən səsini eşidirdilər.
Amansız xəstəliyə düçar olsa da, bunu ətrafdakılara
bildirməməyə çalışırdı.
O, səsindəki şuxluğu
sona qədər qoruyub saxladı.
Sonuncu dəfə Mədəniyyət
və Turizm Nazirliyinin təsis etdiyi «Fəxri Mədəniyyət İşçisi»
və «Fəxri Turizm İşçisi» döş nişanlarının
təqdimetmə mərasimindən
əvvəl zəng etdim ona. Vəziyyətini bilsəm də, xoş xəbərlə bağlı muştuluqlayıb,
«Tədbirə gedəcəksinizmi,
Sabir müəllim» - deyə soruşdum. Səsi çox zəifləmişdi.
Amma həmişəki kimi, o, bunu hiss etdirmək istəmirdi. «Gələ
bilməyəcəyəm, amma
çox sevindim, turizm sektoru təmsilçiləri üçün
fəxri adın təsis edilməsi
bizim böyük uğurumuzdur» - dedi.
Ömrünü
Azərbaycan turizminin inkişafına, bu istiqamətdə dəyərli
elmi məqalələrin,
ali məktəb tələbələri üçün
dərsliklərin, mehmanxana
və turizm şirkətləri üçün
məlumat kitablarının
yazılmasına həsr
edən Sabir Rəhimov iyulun 18-də 72
yaşında dünyasını
dəyişdi.
* * *
Sabir Rəhimovun həmkarları,
dostları onunla bağlı ürək sözlərini, xatirələrini
qəzetimizlə bölüşdülər.
Bakı Dövlət Universitetinin iqtisadi-siyasi coğrafiya və turizm kafedrasının müdiri
Həbibə Sultanova:
- Sabir müəllimin vəfatı
Azərbaycan turizmi üçün ağır
itkidir. Sabir Rəhimov əsasən
magistraturada oxuyan tələbələrə dərs
keçirdi. Heç vaxt
tələbələrdən bildiyini əsirgəməzdi.
Magistr dissertasiyalarının yazılmasında
tələbələrə çox böyük köməklik göstərər,
onlara istiqamət verərdi. Magistratura pilləsində dərs
deyən ən savadlı, ən səriştəli mütəxəssis
kadr idi. Mən onun haqqında danışmağa çox
çətinlik çəkirəm.
İnsan
kimi də onun tayı-bərabəri
yox idi. Çox mədəni, işinə
məsuliyyətli gözəl
bir insan idi. Ölümü elə qəfil oldu ki, heç
kim buna
inanmır. Allah rəhmət eləsin.
Azərbaycan Turizm İnstitutunun rektoru Cəfər Cəfərov:
- Sabir
Rəhimov çox gözəl turizm mütəxəssisi idi.
O, uzun müddət Bakı Dövlət Universitetində dərs deyib. Onu ATİ-yə dəvət
etdik, lakin vaxtı olmadığına
görə bizə gələ bilmədi.
Son dərəcə nəcib, ağsaqqal bir insan idi.
Məndən böyük
olmasına baxmayaraq, həmişə məni utandıracaq bir hərəkət edirdi: bayram günləri zəng edib məni təbrik edənlərdən idi. Çox diqqətcil, işini bilən bir insan idi. Azərbaycan turizmində onun yeri görünəcək.
Böyük məsləhətinə ehtiyacımız olanda həmişə onu dəvət edirdik. ATİ-də təşkil
olunan bələdçi
kurslarında Attestasiya
Komissiyasının üzvü
idi.
O, 70-ci illərdən
bu vaxta qədər eyni müəssisədə - Turizm
və Ekskursiya Şurasında çalışıb.
Zəngin təcrübəyə malik idi. Sabir müəllimin kitabları
bizim institutun tələbələri üçün
həmişə dəyərli
vəsait olacaq. Onun kitabları turizmlə bağlı Azərbaycan dilində nəşr edilən azsaylı vəsaitlərdəndir. O bu sahədə ilk iş görənlərdən
idi. Qəbri nurla dolsun.
Mədəniyyət
və Turizm Nazirliyi Turizm şöbəsinin Tədqiqat
işləri, statistika
və lisenziyalaşdırma
sektorunun müdiri Rəhman Oruclu:
- Sabir
Rəhimov Azərbaycan
turizm ictimaiyyətinin
ən parlaq nümayəndələrindən biri idi. O hələ gənc yaşlarından turizm sahəsində çalışmağa
başlamışdı. Çox təvazökar,
dostlarına, yoldaşlarına,
tələbələrinə qarşı son dərəcə
həssas, qayğıkeş
bir insan idi.
Sabir Rəhimovun əməyi
dövlətimiz tərəfindən
yüksək qiymətləndirilmişdir.
O, «Tərəqqi» medalı
və “Əməkdar mədəniyyət işçisi”
fəxri adına
layiq görülmüş,
çoxsaylı diplomlar,
mükafatlarla təltif
olunmuşdur.
Onun adı Azərbaycan
turizm ictimaiyyətinin,
həmkarlarının və
tələbələrinin qəlbində
həmişə yaşayacaq.
Azərbaycan Turizm Assosiasiyası sədrinin müavini Müzəffər Ağakərimov:
- Sabir
Rəhimov öz işini, sənətini
son dərəcə sevən
bir insan idi. Onun iş otağına daxil olanda hiss olunurdu ki, qarşında
turizm sahəsinin vurğunu olan, onu çox sevən bir insan dayanıb. Onun dərs vəsaiti kimi beş kitabı
nəşr olunub. Turizmin inkişafı, gələcəkdə
bu sahəni Azərbaycanda necə gördüyü haqda tez-tez söhbətlərimiz
olardı. Sabir müəllim
turizmin canlı ensiklopediyası idi. Eyni zamanda turizm tarixini tədqiq edirdi. Azərbaycanda onun qədər bu sahədə məlumatlı adam
yox idi. Bütün bunlardan əlavə, Sabir Rəhimov yaxşı bir kolleksiyaçı idi.
Onun iş otağında 3500-ə qədər
turizmə aid nişan vardı. Bu bir daha sübut edir ki, Sabir müəllim
bu sahəni nə qədər sevirdi.
Biz Sabir
Rəhimov haqqında danışanda onun Azərbaycanda turizmin inkişafındakı rolunu,
gördüyü işləri
çox xatırlayacağıq.
Zaman keçdikcə onun itkisini daha
çox hiss edəcəyik.
Çünki belə mütəxəssislər
indi çox azdır. Allah rəhmət eləsin.
* * *
İnsan var ki, Allahın ona bəxş etdiyi ömrü elə yaşayır ki, yalnız qohumları və yaxınları tərəfindən anılır. İnsan da var ki, xalqına, millətinə, çalışdığı sahəyə töhfələr verir, yüzlərin, minlərin sevimlisi kimi köçür bu dünyadan. Sabir Rəhimov kimi...
Qəbri nurla dolsun.
Fəxriyyə Abdullayeva
Mədəniyyət.- 2013.- 24 iyul.-
S. 10.