Milli Azərbaycan Tarixi Muzeyində ilin birinci yarısına yekun vurulub

Azərbaycan Milli Elmlər Akademiyasının Milli Azərbaycan Tarixi Muzeyində keçirilən toplantıda ölkə başçısının müvafiq sərəncamlarının icrası ilə bağlı 2013-cü ilin birinci yarısında görülmüş işlərin yekunu müzakirə olunub. Ötən müddətdə muzeydə bir sıra mühüm tədbirlər gerçəkləşib.

Ümummilli lider Heydər Əliyevin 90 illik yubileyi münasibətilə aprelin 18-19-da “Azərbaycan tarixinin öyrənilməsində muzeylərin rolu və problemləri” mövzusunda üçüncü respublika elmi konfransı keçirilib. Prezidentin “Əlimərdan bəy Topçubaşovun 150 illik yubileyinin keçirilməsi haqqında” 2013-cü il 25 fevral tarixli sərəncamının icrası ilə əlaqədar mayın 23-də muzeydə respublika elmi seminarı təşkil olunub.

Azərbaycan Prezidentinin “Azərbaycanda peşəkar milli teatrın yaradılmasının 140 illiyi haqqında” 2013-ci il 1 mart tarixli sərəncamına müvafiq olaraq muzeyin kolleksiyası əsasında hazırlanan “Bakının teatr tarixi” kataloqu üzərində iş aparılıb. Nəşrin hazırlanması oktyabrda yekunlaşacaq.

Mədəniyyət.- 2013.- 26 iyul.- S. 4.