Rusiya İnformasiya-Mədəniyyət Mərkəzində mətbuat bayramı

22 iyul - Azərbaycan Milli Mətbuat Günü münasibətilə Rusiya İnformasiya-Mədəniyyət Mərkəzində jurnalistlərlə görüş olub. “Rossotrudniçestvo” agentliyinin Azərbaycandakı nümayəndəliyinin rəhbəri Valentin Denisov və Rusiyanın ölkəmizdəki səfirliyinin mətbuat katibi Alina Zolotaryova jurnalistləri peşə bayramları münasibətilə təbrik ediblər. Görüş iştirakçılarına təşəkkürnamə və xatirə hədiyyələri təqdim olunub.

Rusiya İnformasiya-Mədəniyyət Mərkəzi yanında gənclərin “Sozvezdiye” yaradıcılıq klubunun üzvləri mətbuat nümayəndələrini musiqi ilə təbrik ediblər. Üzeyir Hacıbəyli adına Bakı Musiqi Akademiyasının tələbələri Dilarə Əliyeva və Nigar Hüseynova, Bülbül adına musiqi məktəbinin şagirdi Orxan Cəlilov və Bakı şəhərindəki 12 nömrəli musiqi məktəbinin məzunu Vaqif Nağıyev rus və Azərbaycan dillərində mahnılar ifa ediblər.

Mədəniyyət.- 2013.- 26 iyul.- S. 13.