Soyqırımı qurbanlarının uyuduğu torpaq Çanaqqala muzeyində

Ermənilərin XX əsrin əvvəllərində Azərbaycanda soyqırımları törətmələri barədə dünya ictimaiyyətinin məlumatlandırılması yönündə daha bir addım atılıb. Bundan sonra Türkiyədəki məşhur Çanaqqala Tarix Muzeyinin müqəddəs torpaqlar guşəsində Azərbaycan torpağı da nümayiş etdiriləcək. Muzeyə göndərilən torpaq 1918-ci ildə erməni daşnak qüvvələrinin xalqımıza qarşı törətdiyi soyqırımının acı nümunəsi olan Quba kütləvi məzarlığından götürülüb.

Çanaqqala Tarix Muzeyinin müqəddəs torpaqlar guşəsində dünyanın müxtəlif yerlərindəki şəhid məzarlıqlarından götürülmüş torpaq nümunələri saxlanılır. Torpaq nümunəsi ilə yanaşı, muzeyə ötən əsrin əvvəllərində Azərbaycanın şimalında baş verən soyqırımı ilə bağlı ətraflı məlumat da göndərilib. Bunun sayəsində hər il muzeyə gələn minlərlə ziyarətçi həmin guşəni seyr edərkən ermənilərin başımıza gətirdikləri faciələr barədə ətraflı informasiya ala biləcəklər.

2004-cü ildən fəaliyyət göstərən Çanaqqala Tarix Muzeyində müqəddəs torpaqlar guşəsi ziyarətçilərin ən çox diqqətini çəkən hissələrdəndir.

Quba məzarlığı 2007-ci ilin aprelində aşkarlanıb. Məzarlıqdan əksəriyyəti uşaq, qadın və qocalara məxsus olan 400-dən çox insanın sümükləri tapılıb. Azərbaycan Milli Elmlər Akademiyasının Arxeologiya və Etnoqrafiya İnstitutu tərəfindən aparılan tədqiqatlar nəticəsində məlum olub ki, məzarlıqda kütləvi şəkildə basdırılanlar ötən əsrin əvvəllərində erməni silahlıları tərəfindən vəhşicəsinə öldürülən yerli sakinlərdir.

Mədəniyyət.- 2013.- 1 mart.- S. 7.