“Leyli və Məcnun” film-operasının premyerası

“Muğam aləmi” III Beynəlxalq Muğam Festivalı çərçivəsində təqdim olunan maraqlı layihələrdən biri də Mədəniyyət və Turizm Nazirliyinin dəstəyi ilə ekranlaşdırılan “Leyli və Məcnun” film-operası oldu. Martın 17-də Nizami Kino Mərkəzində film-operanın təqdimatı keçirildi. Mərasimdə dövlət və hökumət rəsmiləri, elm və mədəniyyət xadimləri ilə yanaşı, məşhur fransız aktyoru Jerar Depardye və kinoprodüser Arno Frille də iştirak edib.

Tədbirdə çıxış edən mədəniyyət və turizm nazirinin müavini Ədalət Vəliyev bildirib ki, dahi bəstəkar Üzeyir Hacıbəylinin eyniadlı operası əsasında çəkilən ekran əsərinin ssenari müəllifi və rejissoru Mehdi Məmmədovdur. O, babası - Azərbaycan mədəniyyət tarixində onlarla tamaşaya quruluş verən görkəmli rejissor Mehdi Məmmədovun, nənəsi - Xalq artisti Barat Şəkinskayanın, atası - istedadlı rəssam Elçin Məmmədovun sənət yolunun davamçısıdır. Təsadüfi deyil ki, o, filmi babası Mehdi Məmmədova ithaf edib.

Diqqətə çatdırılıb ki, operatoru Oleq Topoyev olan filmin işıq korreksiyası Aleksandr Lebeşevə məxsusdur. Şərq miniatür nümunələri əsasında hazırlanan dekorasiyaların müəllifləri Kərim Şəkinski, Rəşad Ələkbərov, Mehdi Məmmədov və Nəriman Məmmədzadədir.

Film-operada Məcnun rolunu Xalq artisti Mənsum İbrahimov, Leyli obrazını Xalq artisti Aygün Bayramova canlandırıb. Onları əməkdar artistlər - tarda Elçin Həşimov, kamançada Elnur Əhmədov, Qara Qarayev adına Azərbaycan Dövlət Kamera Orkestri (dirijor Xalq artisti Teymur Göyçayev), Dövlət Xor Kapellası, Dövlət Rəqs Ansamblı müşayiət ediblər. 50 dəqiqəlik film-operanın çəkilişləri Opera və Balet Teatrında və “Buta Palace”da aparılıb. Layihənin ərsəyə gəlməsində xalq artistləri Siyavuş Kərimi, Gülbacı İmanova və Afaq Məlikovanın böyük zəhməti olub.

Film böyük maraqla izlənilib. Sonda yaradıcı heyət səhnəyə dəvət olunub. Ekran əsərinin ssenari müəllifi və rejissoru Mehdi Məmmədov tamaşaçılara minnətdarlığını bildirib.

Filmi yüksək qiymətləndirən Jerar Depardye Azərbaycanda keçirilən beynəlxalq muğam festivalının böyük əhəmiyyət daşıdığını, ölkəmizdə musiqiyə olan böyük marağı xüsusi qeyd edib.

Mədəniyyət.- 2013.- 20 mart.- S. 6.