“Heydər Əliyev və muzeylərimiz”

Ulu öndərin rəhbərliyi dövründə respublikamızda muzey işində yeni mərhələnin əsası qoyulub

Aprelin 30-da Muzey Mərkəzində “Heydər Əliyev və muzeylərimiz” mövzusunda konfrans keçirildi. Mədəniyyət və Turizm Nazirliyinin Mədəniyyətşünaslıq üzrə Elmi-Metodik Mərkəzinin təşkil etdiyi tədbir ümummilli liderin 90 illik yubileyinə həsr olunmuşdu.

Əvvəlcə iştirakçılar ulu öndər Heydər Əliyevin muzey işi sahəsində göstərdiyi əvəzsiz xidmətləri əks etdirən fotoşəkillərdən ibarət slayda baxdılar.

Tədbirdə çıxış edən mədəniyyət və turizm nazirinin müavini Sevda Məmmədəliyeva ulu öndərin müstəqil Azərbaycanın inkişafı naminə gördüyü işlərdən söz açdı. Bildirdi ki, zəngin və mənalı həyat yaşamış Heydər Əliyevin fəaliyyəti hər kəs üçün örnəkdir. Məhz onun qətiyyəti, əzmkarlığı sayəsində Azərbaycan dövlət müstəqilliyini qoruyub saxladı və inkişaf etdi. O, hər zaman özünü əsl öndər, milli lider kimi təsdiq etmişdir. Bu dahi insan tarixi yazan və yaradan, onu ölkənin, xalqın mənafeyinə yönəltməyi bacaran nadir şəxsiyyətlərdən idi.

Nazir müavini vurğuladı ki, Heydər Əliyev Azərbaycana rəhbərliyi dövründə mədəniyyət və incəsənətə xüsusi diqqət və qayğı göstərirdi. Dahi rəhbər həmişə bu sahədə çalışanlara dayaq olur, mədəniyyət, o cümlədən, muzey işçilərinin fəaliyyətini yüksək dəyərləndirirdi: “Məhz onun rəhbərliyi dövründə respublikamızda muzey işində yeni mərhələnin əsası qoyuldu. Azərbaycanın bir çox incəsənət xadimlərinin xatirə muzeyləri yaradıldı. Ulu öndərin muzey şəbəkəsinin inkişafı, fəaliyyətdə olan muzey fondlarının zənginləşməsi, yeni muzeylərin yaradılması sahəsində tarixi rolu danılmazdır. 1980-ci illərdə bölgələrin bir çoxunda onun qayğısı sayəsində tarix-diyarşünaslıq muzeyləri yaradıldı”.

Azərbaycanda muzeylərin maddi-texniki bazasının möhkəmləndirilməsi istiqamətində görülən işlərdən danışan nazir müavini respublikamızda 250-dək muzeyin fəaliyyət göstərdiyini bildirdi. Son illər yeni muzeylərin yaradılması, bir çox muzeylərdə əsaslı bərpa və yenidənqurma işlərinin aparılması və digər tədbirlər bu sahəyə göstərilən diqqət və qayğının nəticəsidir: “Müstəqillik dövründə ölkəmizdə 50-dən çox yeni muzey açılıb, onlarla muzey binası əsaslı bərpa və yenidənqurma işlərindən sonra istifadəyə verilib. Ötən dövrdə ölkədə muzey işinin dünya standartları səviyyəsində qurulması, maddi-texniki bazanın möhkəmləndirilməsi, müasir informasiya-kommunikasiya texnologiyalarının tətbiqi, mədəni xidmət işinin keyfiyyətinin yüksəldilməsi sahəsində önəmli işlər görülüb”.

Qeyd olundu ki, Prezident İlham Əliyev tərəfindən 2007-ci ildə imzalanan “Azərbaycanda muzey işinin yaxşılaşdırılması haqqında” sərəncam, habelə 22 may 2009-cu il tarixli sərəncamla təsdiq olunan «Azərbaycanın regionlarında fəaliyyət göstərən muzeylərin müasir standartlara uyğun təmirinə, yeni avadanlıq və zəruri eksponatlarla təchizatına dair xüsusi Tədbirlər Planı» ölkə rəhbərliyi səviyyəsində bu sahənin daim diqqət mərkəzində saxlanıldığını göstərir. Bütün bunlar, eyni zamanda müasir qloballaşma şəraitində bu sahədə olan yeniliklərin, dünya təcrübəsinin tətbiq edilməsi muzeylərin inkişafı üçün yeni imkanlar açıb.

Vurğulandı ki, son illər ölkəmizin muzeylərinin əlaqələri genişlənir, muzey işi sahəsində müxtəlif beynəlxalq müqavilələr imzalanır. Azərbaycanın muzey mütəxəssisləri bir çox beynəlxalq konfrans, simpozium, seminar-treninqlərdə iştirak edirlər. Muzeylər vasitəsilə Azərbaycanın mədəniyyəti, tarixi geniş təbliğ edilir.

Konfransda Milli Azərbaycan Tarixi Muzeyinin direktoru, akademik Nailə Vəlixanlı, Azərbaycan Xalçası və Xalq Tətbiqi Sənəti Dövlət Muzeyinin direktoru, sənətşünaslıq doktoru, professor Röya Tağıyeva və başqaları çıxış edərək ulu öndərin muzey sahəsinin inkişafında tarixi rolundan danışdılar, xatirələrini bölüşdülər. Qeyd olundu ki, ümummilli liderin Azərbaycan mədəniyyətinin, incəsənətinin qorunması, inkişafı və gələcək nəsillərə çatdırılması istiqamətində gördüyü böyük işlər bu gün ölkə başçısı İlham Əliyev tərəfindən uğurla davam etdirilir.

Ceyhun Zərbəliyev

Mədəniyyət.- 2013.- 1 may.- S. 4.