Ulu öndərin mədəniyyət konsepsiyası məcrasında

“Heydər Əliyev: mədəniyyət və əbədiyyət” kitabı işıq üzü görüb

Müstəqil Azərbaycanın memarı, ümummilli lider Heydər Əliyevin misilsiz dövlətçilik fəaliyyətini əks etdirən yeni-yeni tədqiqat əsərləri yazılır. Onun tarixi fəaliyyətinin əsas istiqamətlərindən biri də mədəniyyət və incəsənətimizin tərəqqisi ilə bağlıdır. Ulu öndər Azərbaycan mədəniyyətinin və incəsənətinin böyük hamisi idi.

Hər bir xalqın mədəniyyəti onun böyüklüyünün, müdrikliyinin, birliyinin təcəssümüdür. Azərbaycan xalqı qədim tarixi və mədəniyyəti ilə bütün dünyada tanınmışdır. Milli mədəniyyətimizin yaranmasında və mənəvi rolunun yüksək dəyərləndirilməsində tarix boyu bir çox şəxsiyyətlərin xidməti olmuşdur ki, yeni dövrün də belə nəhəng şəxsiyyəti Heydər Əliyevdir. Azərbaycan mədəniyyətinin hərtərəfli inkişafında, xalqımızın zəngin mənəvi-mədəni irsinin dünya mədəni aləminə çatdırılmasında Heydər Əliyev çox böyük rol oynamışdır.

Azərbaycan Mədəniyyət və İncəsənət Universitetinin rektoru, filologiya elmləri doktoru, professor Timuçin Əfəndiyevin “Heydər Əliyev və milli mənəvi dəyərlərimiz” monoqrafiyasında və bu günlərdə çapdan çıxmış «Heydər Əliyev: mədəniyyət və əbədiyyət» (Bakı, Təhsil, 2013) kitabında dahi şəxsiyyətin bu sahədə gördüyü işlərdən nəzəri-analitik üslubda söhbət açılır.

Dünya şöhrətli siyasətçi Heydər Əliyevin milli mədəniyyətimizin tarixində misilsiz xidmətlərindən bəhs edən fotomonoqrafiya dahi liderin anadan olmasının 90 illiyinə həsr olunub. Kitabda mətn və şəkillərin vəhdəti əsasında ümummilli liderin mədəniyyət və incəsənətimizə tarixi töhfələri əksini tapıb.

Heydər Əliyevin adı onunla eyni epoxada yaşayıb işləmiş, mənalı çıxışlarını dinləmiş, canlı ünsiyyətdə olmuş insanlar üçün olduqca əziz və doğmadır.

Fotomonoqrafiya ulu öndərin çoxcəhətli mədəniyyət nəzəriyyəsinin təbliğinə həsr olunmuşdur. Heydər Əliyev istər çoxəsrlik zəngin ədəbiyyatımız, istərsə də qədim və bədii cəhətdən kamil mədəniyyət və incəsənətimizin ayrı-ayrı sahələrindən bəhs edərkən bütün bunlara dövlətçilik nöqteyi-nəzərindən, azərbaycançılıq fəlsəfəsinin məxəzləri kimi yanaşmışdır.

Ulu öndər deyirdi: “Ədəbiyyatımızın, incəsənətimizin, mədəniyyətimizin ən böyük və fərqləndirici xüsusiyyətlərindən biri də odur ki, zaman-zaman istedadlı insanlar mədəniyyətimizdə yeni yollar, yeni cığırlar açırlar, yeni formalar meydana gətirirlər”.

Müasir ədəbiyyatımızın, incəsənətimizin və mədəniyyətimizin bəşəri arenada öz nadir inciləri ilə dünyanı heyran qoyması, ölkəmizin şöhrətini ucaltması, xalqımızın qədim mədəniyyətə malik olması bu müdrik fikri təsdiq edir. Məlum olduğu kimi, XX əsrdə Azərbaycan mədəniyyətinin bütün sahələrinin sürətli inkişafı, geniş miqyasda təbliği və böyük nailiyyətləri bilavasitə Heydər Əliyevin müstəsna tarixi xidmətlərinin nəticəsi idi. Onun respublikaya rəhbərlik etdiyi 70-ci illərdən başlayaraq mədəni və ədəbi irsimizə, təsviri sənətə, teatra qayğı xeyli dərəcədə artmışdı. Heydər Əliyevin bilavasitə himayədarlığı və gərgin səyləri nəticəsində bu gün Azərbaycan incəsənəti bütün dünya miqyasında tanınmışdır.

Onun nəzəri siyasi irsi, dövlətçilik və millətçilik təcrübəsi bizim milli sərvətimiz, tövsiyələri yaddaşımızın əbədiyyət dərsidir. Bu nəşrin indi işıq üzü görməsinin bir əlamətdar cəhəti də budur ki, öz fəaliyyətində Heydər Əliyev ideyalarını həyata keçirən Azərbaycan Dövlət Mədəniyyət və İncəsənət Universitetinin 2013-cü ildə 90 illiyi tamam olur. Təqdim olunan fotomonoqrafiya 1969-cu ildən sonrakı dövrdə - Heydər Əliyev epoxasında yaşayan mədəniyyət və incəsənət xadimlərinin həyat və yaradıcılığına ulu öndərin göstərdiyi diqqət və qayğı ön plana çəkilir. Dahi rəhbərin mədəniyyətimizin böyük hamisi olması fikri əsaslandırılır. Kitab geniş oxucu kütləsi üçün nəzərdə tutulub.

Mədəniyyət.- 2013.- 15 may.- S. 10.