Özbəkistanda Azərbaycan dili kursları

Prezident İlham Əliyevin 2013-cü il 9 aprel tarixli sərəncamı ilə təsdiq edilmiş "Azərbaycan dilinin qloballaşma şəraitində istifadəsinə və ölkədə dilçiliyin inkişafına dair Dövlət Proqramı"na uyğun olaraq, ölkəmizin Özbəkistandakı səfirliyinin nəzdindəki Heydər Əliyev adına Mədəniyyət Mərkəzində Azərbaycan dili kursları fəaliyyətə başlayıb.

Mayın 1-də açılan kurs azərbaycanlı müəllim, 40 il bu sahədə iş təcrübəsi olan Salama Fətəliyeva tərəfindən aparılır. Kurslar ödənişsizdir.

Heydər Əliyev adına Mədəniyyət Mərkəzinin direktoru Samir Abbasov bildirib ki, kurs iştirakçıları zəruri əyani vəsait və nəşrlərlə təmin edilir. Mərkəzin kitabxanası Azərbaycan dilinin tədrisi ilə bağlı yeni nəşrlərlə zənginləşdirilib. Kurslarda yaxşı nəticə əldə edən iştirakçılara yekunda xüsusi sertifikatlar veriləcək.

Mədəniyyət.- 2013.- 22 may.- S. 8.