Xalq artisti Yaşar İmanovun 80 illiyi qeyd olundu

Noyabrın 1-də Azərbaycan Dövlət Filarmoniyasında tanınmış bəstəkar və dirijor, Xalq artisti, Prezident təqaüdçüsü, professor Yaşar İmanovun 80 illiyinə həsr olunmuş yubiley gecəsi keçirildi.

Tədbiri giriş sözü ilə açan Bəstəkarlar İttifaqının katibi, professor Zemfira Qafarova yubilyarın ömür yolu və yaradıcılığı haqqında danışdı. Bildirildi ki, istedadlı musiqiçi uzun illər ölkəmizdən kənarda Azərbaycan mədəniyyətinin, incəsənətinin yorulmaz təbliğatçısı olub. Yaşar Əbdülxalıq oğlu İmanov 1933-cü il martın 21-də Bakıda dünyaya göz açıb. Üzeyir Hacıbəyli adına Azərbaycan Dövlət Konservatoriyası yanında musiqi məktəbini, Asəf Zeynallı adına Musiqi Texnikumunu bitirib. Ali təhsil almaq arzusu ilə Moskvaya gedib. 1958-ci ildə P.İ.Çaykovski adına Moskva Dövlət Konservatoriyasının hərbi dirijorlar fakültəsini bitirib.

Gənc musiqi Gürcüstanın Abxaziya Muxtar Respublikasının Suxumi şəhərinə təyinat alır. Hərbi dirijorluqla yanaşı, Suxumi Opera və Balet Teatrında P.İ.Çaykovskinin “Yevgeni Onegin”, S.Raxmaninovun “Aleko”, Z.Paliaşvilinin “Daisi” operalarını tamaşaya qoyur. 1967-ci ildə yeni yaradılan Abxaziya Dövlət Simfonik Orkestrinin bədii rəhbəri və baş dirijoru təyin olunur, bir müddət Dövlət Xor Kapellasına da başçılıq edir.

Yaşar İmanov abxaz folklorundan faydalanaraq “Hilal gecəsi” operasını yazıb. Simfoniya, simfonik poema, instrumental konsertlər, eləcə də kamera janrlarında qələmini sınayıb, pedaqoji fəaliyyət göstərib.

1992-ci ildə Abxaziyada başlanan müharibə ilə əlaqədar Yaşar İmanov Bakıya köçüb. Dövlət Konservatoriyasında (indiki Bakı Musiqi Akademiyası) professor kimi pedaqoji fəaliyyətlə yanaşı, Azərbaycan Televiziya və Radiosunun Niyazi adına simfonik orkestrində dirijorluq edib. 1994-1998-ci illərdə Qara Qarayev adına Dövlət Kamera Orkestrinin bədii rəhbəri və baş dirijoru olub.

Azərbaycan mədəniyyətinin inkişafındakı xidmətlərinə görə fəxri ad və mükafatlara layiq görülən Yaşar İmanov bəstəkarlıq sahəsində yeniliklərlə zəngin olan maraqlı yaradıcılıq irsinə malikdir.

Sonra Əməkdar incəsənət xadimi Fəxrəddin Kərimovun dirijorluğu ilə Üzeyir Hacıbəyli adına Azərbaycan Dövlət Simfonik Orkestrinin ifasında bəstəkarın “Təntənəli marş”, “3 saylı simfoniya”, xor və simfonik orkestr üçün “Kantata” əsərləri səsləndirildi. Xalq artisti Gülbacı İmanovanın rəhbərliyi ilə Azərbaycan Dövlət Xor Kapellasının, Tural Ağasıyevin (bariton), Əməkdar incəsənət xadimi Ülviyyə Hacıbəyovanın ifalarında fortepiano və simfonik orkestr üçün “Konsert-ballada”, Günel Kazımovanın ifasında isə fortepiano və simfonik orkestr üçün “Xatirə” əsərləri səsləndirildi.

Savalan Fərəcov

Mədəniyyət.- 2013.- 6 noyabr.- S. 11.