“Azərbaycan -tolerantlıq məkanı”

BMT-nin Nyu-Yorkdakı mənzil-qərargahında fotosərgi

Sentyabrın 27-də BMT-nin Nyu-Yorkda yerləşən mənzil-qərargahında Heydər Əliyev Fondunun təşəbbüsü, BMT-nin Sivilizasiyalar Alyansı və Azərbaycan Respublikası Dini Qurumlarla İş üzrə Dövlət Komitəsinin birgə təşkilatçılığı ilə “Azərbaycan-tolerantlıq məkanı” mövzusunda fotosərginin açılış mərasimi olub.

Sərgidə Heydər Əliyev Fondunun “Azərbaycan - tolerantlıq ünvanı” layihəsi çərçivəsində dünya şöhrətli fotoqraf, Fransada yaşayan soydaşımız Rza Diqətinin ölkəmizə yaradıcı səfərləri zamanı çəkdiyi şəkillər nümayiş olunur.

Mərasimdə çıxış edən BMT baş katibinin Sivilizasiyalar Alyansı üzrə ali nümayəndəsi Nassir Əbdüləziz əl-Nasser bu il Azərbaycan Prezidenti İlham Əliyevin təşəbbüsü ilə Bakıda keçirilən II Dünya Mədəniyyətlərarası Dialoq Forumunu xatırlayıb, ölkəmizin mədəniyyətlərarası dialoq və dini tolerantlıq sahəsində dərin ənənələrə malik olduğunu vurğulayıb. Onun sözlərinə görə, sərginin BMT Baş Məclisinin 68-ci sessiyası çərçivəsində açılması dünya birliyinin Azərbaycanın multikulturalizm və tolerantlığın təmin olunması sahəsində fəaliyyətinə yüksək qiymət verdiyini göstərir.

Dini Qurumlarla İş üzrə Dövlət Komitəsinin sədri Elşad İskəndərov ölkəmizdə dini tolerantlığın çoxəsrlik tarixindən söz açıb. Qeyd edib ki, multikulturalizm və milli-dini azlıqlara hörmət Azərbaycan xalqının milli xüsusiyyətidir. Son illərdə ölkəmizdə keçirilən beynəlxalq tədbirlər Azərbaycanı mədəniyyətlər və dinlərarası dialoqun mərkəzinə çevirib.

Qeyd edək ki, müstəqillik tarixində ilk dəfə ölkəmizin tolerantlıq ənənələrini BMT-də tərənnüm edən ilk sərgi bir həftə davam edəcək.

Mərasimdə Dini Qurumlarla İş üzrə Dövlət Komitəsinin təşəbbüsü ilə gənclər arasında keçirilən “Photolerance” (“Fotolerans”) adlı beynəlxalq fotomüsabiqənin təqdimatı da olub. Müsabiqənin qalibləri 2014-cü ildə BMT-nin Sivilizasiyalar Alyansının növbəti qlobal forumunda elan ediləcək.

Mədəniyyət.- 2013.- 2 oktyabr.- S. 6.