“Azərbaycan - tolerantlıq məkanı”

Xəbər verdiyimiz kimi, BMT-nin Nyu-Yorkdakı mənzil-qərargahında Heydər Əliyev Fondunun təşəbbüsü, BMT-nin Sivilizasiyalar Alyansı və Azərbaycan Respublikasının Dini Qurumlarla İş üzrə Dövlət Komitəsinin birgə təşkilatçılığı ilə “Azərbaycan - tolerantlıq məkanı” mövzusunda fotosərgi keçirilib.

Bir həftə davam edən sərgidə Heydər Əliyev Fondunun “Azərbaycan - tolernatlıq ünvanı” layihəsi çərçivəsində ölkəmizə dəfələrlə yaradıcı səfərlər etmiş dünya şöhrətli soydaşımız, fotoqraf Rza Diqqətinin ölkəmizdə dini tolerantlığı əks etdirən fotoşəkilləri nümayiş olunub.

Sərgi çərçivəsində Nyu-Yorkun məşhur “Times Square” meydanında işıqlandırılan reklam panellərindən birinin üzərində “BMT-nin Sivilizasiyalar Alyansı və Heydər Əliyev Fondu: “Azərbaycan - tolerantlıq məkanı” Rza Diqqətinin təqdimatında” yazısı əks etdirilib.

“Times Square” meydanı Nyu-York şəhərinin hər gün yüz minlərlə turistin ziyarət etdiyi ən məşhur yerlərindən biridir. Bu, müstəqillik tarixində ölkəmizin tolerantlıq ənənələrini BMT-də tərənnüm edən ilk sərgidir.

Mədəniyyət.- 2013.- 9 oktyabr.- S. 2.