Folklor İnstitutunun elmi jurnallarının saytları yaradılıb

Azərbaycan Milli Elmlər Akademiyası Folklor İnstitutunun “Azərbaycan şifahi xalq ədəbiyyatına dair tədqiqlər” və “Dədə Qorqud” elmi jurnallarının saytları (www.tedqiqler.net və www.dede-qorqud.net) yaradılıb.

İnstitutun mətbuat xidmətindən bildiriblər ki, keçən əsrin 60-cı illərindən fəaliyyətə başlamış “Azərbaycan şifahi xalq ədəbiyyatına dair tədqiqlər” məcmuəsi ölkəmizdə folklorşünaslıq sahəsində ən nüfuzlu akademik nəşrlərdəndir. Məcmuənin postsovet dövründə cəmi yeddi nömrəsi çapdan çıxıb. Folklor İnstitutu yaradıldıqdan sonra artıq jurnalın çapı sabit dövri xarakter daşımağa başlayıb və indiyədək 40 nömrəsi nəşr olunub. Burada çap olunan tədqiqat işləri Azərbaycan folklorşünaslıq elminin simasını əks etdirir.

2001-ci ildən nəşrə başlayan “Dədə Qorqud” jurnalı ümummilli lider Heydər Əliyevin “Kitabi-Dədə Qorqud” eposunun öyrənilməsi və təbliği işinin daim diqqətdə saxlanılması barədə tövsiyə və tapşırıqlarının məhsulu kimi ortaya çıxıb. Nəşrdə “Dədə Qorqud” dastanları ilə bağlı ən son araşdırmalar, elmi qənaətlər və rəylər aparıcı yer tutub. Bundan əlavə, jurnalda milli mədəniyyətin digər sahələri barədə yazılar, yeni folklor mətnləri, türk xalqları folklorundan tərcümələr və s. də yer almaqdadır. “Dədə Qorqud” jurnalının indiyədək 50 nömrəsi dərc edilib.

Jurnalların elektron variantları PDF formasında yerləşdirilib.

Mədəniyyət.- 2013.- 11 oktyabr.- S. 6.