Azərbaycanın müstəqillik günü Daşkənddə qeyd edilib

Azərbaycan Respublikasının Özbəkistandakı səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzində 18 oktyabr - Azərbaycanın Dövlət Müstəqilliyi Gününə həsr olunmuş bayram tədbiri keçirilib.

Mərkəzin direktoru Samir Abbasov tədbiri açaraq, 1918-1920-ci illərdə 23 ay mövcud olmuş Azərbaycan Xalq Cümhuriyyətinin varisi kimi 1991-ci ildə ikinci dəfə müstəqilliyinə qovuşan Azərbaycan Respublikasının keçdiyi çətin və şərəfli yoldan, ümummilli lider Heydər Əliyevin Azərbaycan dövlətçiliyinin qorunub saxlanılması yolunda misilsiz xidmətlərindən danışıb.

Özbəkistan-Azərbaycan Dostluq Cəmiyyətinin icraçı direktoru, Nizami adına Pedaqoji Universitetin professoru Erkin Nuriddinov və Özbəkistan Milli Kulinariya Assosiasiyasının rəhbəri Sünətulla Süleymanov mərasimdə çıxış ediblər.

Tədbirin bədii hissəsində Özbəkistanın tanınmış müğənniləri - "Nixol" Dövlət mükafatının laureatı İsrail Saidumarov, Abdulmalik Tatlı, habelə Azərbaycan Mədəniyyət Mərkəzinin nəzdində yaradılan "Azərbaycan qızları" rəqs kollektivinin çıxışları iştirakçıların böyük marağına səbəb olub. Özbək müğənnilərinin Azərbaycan musiqisindən məşhur mahnıları ifa etməsi alqışlarla qarşılanıb.

Tədbirin sonunda Azərbaycan və Özbəkistan dostluğuna verdikləri töhfəyə, habelə Azərbaycan mədəniyyətinin Özbəkistanda təbliğinə görə özbəkistanlı müğənnilər İsrail Saidumarova, Abdulmalik Tatlıya və "Azərbaycan qızları" rəqs kollektivinin bədii rəhbəri, Əməkdar artist Kökəb Əliyevaya Heydər Əliyev adına Azərbaycan Mədəniyyət Mərkəzinin fəxri fərmanları və pul mükafatları təqdim edilib.

Mədəniyyət.- 2013.- 23 oktyabr.- S. 11.