“Arşın mal alan”ın 100 illik yubileyinə həsr olunmuş konfrans

Oktyabrın 23-də dahi bəstəkar Üzeyir Hacıbəylinin ev-muzeyində “Arşın mal alan” operettasının 100 illik yubileyinə həsr olunmuş konfrans keçirilib. Konfransda Bakı Musiqi Akademiyasının (BMA) professoru, Əməkdar incəsənət xadimi Zemfira Qafarova Üzeyir Hacıbəylinin mənalı ömür yolundan və zəngin yaradıcılığından söhbət açıb, oktyabrın 25-də bəstəkarın “Arşın mal alan” operettasının 100 yaşının tamam olduğunu diqqətə çatdırıb. Qeyd edib ki, operetta dünyanın müxtəlif nüfuzlu teatr səhnələrində tamaşaya qoyulub, bu yaxınlarda Parisdə - UNESCO-nun mənzil-qərargahında “Arşın mal alan”ın 100 illiyinə həsr edilmiş bayram tədbiri keçirilib.

Konfransda Əməkdar incəsənət xadimi, professor İmruz Əfəndiyevanın “Üzeyir Hacıbəylinin musiqi harmoniyası”, muzeyin böyük elmi işçisi Sevinc Aqilqızının “Üzeyir Hacıbəylinin “Arşın mal alan operettasının nəşrlərindəki dəyişikliklər”, BMA-nın magistrantı Humay Fərəcovanın “Arşın mal alan operettasında Üzeyir Hacıbəylinin şairlik istedadı”, muzeyin ekspozisiya şöbəsinin müdiri Gülnarə Ələsgərovanın “100 illik səhnə yolu”, BMA-nın dosenti Könül Nəsirovanın “Arşın mal alan” - oyun daxilində oyun” məruzələri dinlənilib. Bəstəkar Rauf Əliyev və başqa çıxış edənlər Azərbaycan mədəniyyətinin, teatrının həyatında mühüm rol oynamış əsərin möhtəşəmliyindən söhbət açıblar.

Tədbir iştirakçıları “Arşın mal alan”ın 100 illik səhnə həyatını işıqlandıran sərgi ilə tanış olublar.

Mədəniyyət.- 2013.- 25 oktyabr.- S. 3.