Azərbaycanın fəlsəfə elmi dünya konqresində

Yunanıstanın paytaxtı Afina şəhərində keçirilmiş XXIII Dünya Fəlsəfə Konqresində Azərbaycan da geniş nümayəndə heyəti ilə təmsil olunub.

Tədbirdə tanınmış filosof, AMEA-nın müxbir üzvü Səlahəddin Xəlilov, fəlsəfə elmləri doktorları Könül Bünyadzadə, Zakir Məmmədəliyev, Adil Əsədov, Rahid Ulusel, siyasi elmlər doktoru Vəsilə Hacıyeva, fəlsəfə doktorları Ariz Gözəlov, Roida Rzayeva, Rövşən Hacıyev, Əlihəsən Həmzəyev, doktorant Çinarə Məmmədova iştirak ediblər.

Konqresdə elmin fəlsəfəsi, siyasətin fəlsəfəsi, ontologiya, epistemologiya, fəlsəfə tarixi və s. konkret sahələr üzrə bölmə iclaslarından əlavə, görkəmli filosofların təlimlərinə həsr olunmuş fərdi müzakirələr də keçirilib. AMEA-nın müxbir üzvü Səlahəddin Xəlilovun Şərq və Qərb fəlsəfi düşüncəsinin ortaq dəyərləri əsasında hazırladığı yeni fenomenoloji konsepsiya konqres iştirakçılarının diqqət mərkəzində olub. Professor Françesko Alfieri (Vatikan) alimin ingilis dilində nəşr olunmuş “Həyat fenomenologiyası və İdeyanın həyatı” kitabında irəli sürdüyü yeni ideyalar barədə məruzə ilə çıxış edib. Professorlar Daniela Verduççi (İtaliya), Maija Kule (Latviya) və başqaları azərbaycanlı filosofun təlimini fenomenologiyanın Şərq düşüncə ənənələri üzərində qurulmuş yeni istiqaməti kimi dəyərləndiriblər.

Mədəniyyət.- 2013.- 4 sentyabr.- S. 15.