“Azərbaycan tarixinin 10 ili”

Moskvada ölkəmizin hərtərəfli inkişafından bəhs edən kitab çapdan çıxıb

Moskva Dövlət Beynəlxalq Münasibətlər İnstitutunun professoru Stanislav Çernyavskinin “Azərbaycan tarixinin 10 ili: 2003-2013-cü illər” kitabı çapdan çıxıb.

Azərbaycan Respublikası Prezidenti yanında Strateji Araşdırmalar Mərkəzindən bildiriblər ki, kitab müəllif tərəfindən bir ildən çox Azərbaycanda və Rusiyada aparılan tədqiqatların nəticəsidir.

Beş fəsildən ibarət nəşrdə əsası ulu öndər Heydər Əliyev tərəfindən qoyulmuş Azərbaycanın müstəqil daxili və xarici siyasətinin inkişafı, regionda yeri və rolu, xarici tərəfdaşlarla, xüsusən Avropa ilə enerji təhlükəsizliyi istiqamətində əməkdaşlığı, Dağlıq Qarabağ münaqişəsi, həmçinin Prezident İlham Əliyevin uğurlu sosial-iqtisadi islahatları təhlil edilib.

Kitabın 1-2-ci fəsillərində “Əsrin müqaviləsi və Xəzərin sektorlara bölünməsi”, “Yeni nəqliyyat infrastrukturunun yaradılması, enerji strategiyasında qaz-neft faktoru”, 3-cü fəslində “İqtisadi fəaliyyətin liberallaşdırılması, kiçik və orta sahibkarlığa dəstək”, “İnformasiya və kommunikasiya texnologiyaları”, “Gələcəyə baxış - Azərbaycan-2020”, 4-cü fəslində “Qloballaşma dövründə Azərbaycanın xarici siyasətinin oriyentasiyası”, “Həllini gözləyən Dağlıq Qarabağ münaqişəsi”, “Dünya birliyində özünümüəyyənetmə”, “İslam dünyası ilə əlaqə - praqmatizm və balans”, 5-ci fəslində isə “Yeni siyasi məkan və müasirləşdirilmə”, “Yaradıcı gənclər - Azərbaycanın inkişafının generatorudur” mövzuları əksini tapıb.

Azərbaycan Respublikasının Prezidenti yanında Strateji Araşdırmalar Mərkəzi kitabın nəşr olunmasına akademik dəstək göstərib.

Mədəniyyət.- 2013.- 6 sentyabr.- S. 4.