TÜRKSOY-un yubileyinə Üzeyir dühasından musiqi payı

“Arşın mal alan”ın 100 illiyi Parisdən sonra Strasburqda da qeyd olunub

Dahi bəstəkar Üzeyir Hacıbəylinin “Arşın mal alan” operettasının 100 illiyi Avropanın mədəniyyət və siyasət mərkəzləri olan Paris və Strasburqda qeyd olunub. Xəbər verdiyimiz kimi, sentyabrın 17-də UNESCO-nun Parisdəki mənzil-qərargahında gerçəkləşən yubiley tədbirində Azərbaycan, Qazaxıstan, Qırğızıstan və Türkiyə sənətçilərinin ifasında, Qazaxıstanın Karaqanda Simfonik Orkestrinin müşayiəti ilə konsert-tamaşa nümayiş olunub. Tədbir TÜRKSOY-un, Azərbaycan, Qazaxıstan və Türkiyənin UNESCO yanında daimi nümayəndəliklərinin təşkilatçılığı ilə ərsəyə gəlib.

Sentyabrın 19-da isə Strasburqun Musiqi və Konqreslər Sarayında TÜRKSOY-un təşəbbüsü və təşkilatçılığı ilə qurumun yaranmasının 20 illiyi və Üzeyir Hacıbəylinin “Arşın mal alan” operettasının 100 illik yubileyi münasibətilə tədbir keçirilib. Azərbaycanın Avropa Şurası (AŞ) yanında daimi nümayəndəliyindən bildiriblər ki, konsert-tamaşanın təqdimatından əvvəl sarayın foyesində Üzeyir Hacıbəylinin ev-muzeyinin materialları əsasında “Arşın mal alan” operettasının tarixinə aid, eləcə də TÜRKSOY-un 20 illik fəaliyyətinə həsr olunmuş fotoşəkillərdən ibarət sərgi açılıb.

Mərasimdə TÜRKSOY-un baş katibi Düsen Kaseinov, Azərbaycanın və Türkiyənin Avropa Şurası yanında daimi nümayəndələri çıxış edib.

Operettanın nümayişindən əvvəl isə Avropa Şurası baş katibinin müavini Qabriela Battaini-Draqoni və TÜRKSOY-un baş katibi Düsen Kaseinov türk xalqlarının dünya mədəniyyətinə verdikləri töhfələrdən söz açıb, dahi Azərbaycan bəstəkarının yaradıcılığından bəhs edib, 100 yaşlı “Arşın mal alan” operettasının bir çox dillərə tərcümə olunduğunu və müxtəlif ölkələrdə səhnəyə qoyulduğunu qeyd ediblər.

Sonra Azərbaycan Respublikasının Xalq artisti, professor Ağaverdi Paşayevin rəhbərliyi, Qazaxıstanın Karaqanda şəhərinin “Tattımbet” xalq çalğı alətləri orkestrinin müşayiəti ilə Azərbaycan, Türkiyə, Qazaxıstan və Qırğızıstandan olan aktyorların ifasında “Arşın mal alan” operettası əsasında konsert-tamaşası təqdim olunub.

Gecədə Avropa Şurası yanında akkreditə olunmuş diplomatik korpusun təmsilçiləri, Alzas regionunun dövlət və yerli idarəetmə orqanlarının, habelə Strasburq Universiteti və akademik dairələrin nümayəndələri, azərbaycanlı və türk diasporu üzvləri iştirak ediblər. Konsert-tamaşa böyük rəğbətlə qarşılanıb.

Mədəniyyət.- 2013.- 25 sentyabr.- S. 6.