Hacı Zeynalabdin Tağıyev haqqında yeni kitab

AMEA-nın Milli Azərbaycan Tarixi Muzeyi tərəfindən görkəmli sahibkar, xeyriyyəçi və ictimai xadim Hacı Zeynalabdin Tağıyev haqqında yeni kitab nəşr olunub. “Müasirləri Hacı Zeynalabdin Tağıyev haqqında” kitabın müəllifi muzeyin elmi katibi, tarix üzrə fəlsəfə doktoru Fərhad Cabbarovdur.

“Ziya” nəşriyyatında çapdan çıxan kitabda müasirlərinin Hacı Zeynalabdin Tağıyev haqqında xatirələri və oçerkləri toplanıb.

Nəşrdə görkəmli xeyriyyəçinin ilk bioqrafı olmuş Nəriman Nərimanovun, 1903-cü ildə çap edilmiş naməlum müəllifin, Nağı bəy Şeyxzamanlının Hacı Zeynalabdin Tağıyev haqqında oçerkləri verilib. Həmçinin dövrün görkəmli ziyalılarının onun fəaliyyəti, müsəlman dünyasında ilk qız məktəbinin açılışı və Mərdəkan bağçılıq məktəbinin təşkili ilə bağlı yazıları da oxuculara təqdim olunub.

Nəşrin maraq doğuran məqamlarından biri də “H.Z.Tağıyev toxuculuq fabriki fəhlələrinin gözü ilə” və “H.Z.Tağıyev Bakı sakinlərinin xatirələrində” fəsilləridir. Müasirlərinin görkəmli ictimai xadimə həsr etdikləri şeirlər də kitabda yer alıb.

Mədəniyyət.- 2013.- 25 sentyabr.- S. 15.