“Ocaq” Azərbaycan mədəniyyətindən söz açır

Estoniyanın “R4” dalğalarında efirə gedən “Ocaq” radio verilişi yay mövsümündən sonra ilk buraxılışını Azərbaycan musiqisinə həsr edib. Verilişdə milli incəsənətimizin incisi sayılan muğamdan, xalq musiqimizdən (“Sarı gəlin”), caz və estrada musiqisindən söhbət açılıb, nümunələr səsləndirilib.

Həmçinin Narva şəhərində yaşayan gənc azərbaycanlı müğənni Almaz Rüstəmovanın yaradıcılığından bəhs edilib. Almaz Rüstəmova uşaq yaşlarından yaradıcılığa başlayıb və Narvada “Little Jazz band” caz orkestrində çıxış edib. 2007-ci ildə isə Estoniyada keçirilmiş “Tahtede laul” (“Ulduzların mahnısı”) Beynəlxalq musiqi festivalında 2-ci yerə layiq görülüb.

“Ocaq” verilişi 2010-cu ildən etibarən “R4” dalğalarında efirə gedir və geniş dinləyici kütləsinin rəğbətini qazanıb. Verilişin baş redaktoru Sənəm Əliyevadır.

Mədəniyyət.- 2013.- 13 sentyabr.- S. 6.