Gənc Tamaşaçılar Teatrında Şekspirin 450 illiyi qeyd olunub

Dövlət Gənc Tamaşaçılar Teatrında dahi ingilis şairi və dramaturqu Uilyam Şekspirin anadan olmasının 450 illiyinə həsr edilmiş tədbir keçirilib.

Dramaturqun “Romeo və Cülyetta” tamaşasının nümayişindən əvvəl keçirilən tədbirdə teatrın direktoru, Əməkdar artist Mübariz Həmidov Azərbaycan teatrının inkişafında U.Şekspir yaradıcılığının mühüm rolunu diqqətə çatdırıb. Teatrlarımızda dramaturqun böyük müvəffəqiyyətlə səhnələşdirilmiş əsərlərindən söhbət açılıb. Bildirilib ki, Gənc Tamaşaçılar Teatrında səhnələşdirilmiş “Romeo və Cülyetta” əsəri tamaşaçılar tərəfindən rəğbətlə qarşılanıb.

“British Council” təşkilatının Azərbaycan nümayəndəliyinin direktoru Elizabet Uayt böyük dramaturqun əsərlərinin dünyanın bir çox dillərinə tərcümə olunub səhnəyə qoyulduğunu qeyd edib.

Tədbirdən sonra dramaturqun Dövlət Gənc Tamaşaçılar Teatrının repertuarında olan “Romeo və Cülyetta” tamaşası nümayiş etdirilib. Azərbaycan Dillər Universitetinin müəllim və tələbə kollektivi, teatrsevərlər klubunun üzvləri tamaşanı izləyənlər arasında olublar.

Mədəniyyət.- 2014.- 23 aprel.- S. 4.