Yaponiyanın sabiq baş naziri Nizami Gəncəvi Beynəlxalq Mərkəzinə üzv olub

Nizami Gəncəvi Beynəlxalq Mərkəzi baş katibliyinin nümayəndə heyəti qurumun beynəlxalq əlaqələrini gücləndirmək, həmçinin Diasporla İş üzrə Dövlət Komitəsinin dəstəyi ilə təşkil ediləcək III Qlobal Müştərək Cəmiyyətlər Forumuna hazırlıqla əlaqədar Yaponiyanın paytaxtı Tokioya səfər edib.

Səfər zamanı Yaponiyanın ictimai-siyasi xadimləri ilə keçirilmiş görüşlərdə qlobal problemlər, Azərbaycanla Yaponiya arasında mədəni və elmi əməkdaşlığın möhkəmləndirilməsi istiqamətində fikir mübadiləsi aparılıb.

Tokioda Yaponiyanın sabiq baş naziri Yukio Hatoyama, UNESCO-nun sabiq baş direktoru Koişiro Matsuura, Sasakava Sülh Fondunun baş məsləhətçisi Yoşiaki Sasaki və digər şəxslərlə görüşlər keçirilib.

Müzakirələrin sonunda Yaponiyanın sabiq baş naziri Yukio Hatoyama Nizami Gəncəvi Beynəlxalq Mərkəzinə üzv olmaq barədə dəvəti qəbul edib. Yukio Hatoyama, eləcə də ölkənin digər sabiq baş naziri Yasuo Fukuda, UNESCO-nun sabiq baş direktoru Koişiro Matsuura və həmçinin Yaponiyanın bir sıra nüfuzlu ictimai-siyasi xadimləri 2015-ci ildə Bakıda keçiriləcək III Müştərək Cəmiyyətlər Forumuna dəvət olunub.

Mədəniyyət.- 2014.- 13 avqust.- S. 4.