Ölkəmiz Seulda turizm forumunda təmsil olunub

Cənubi Koreyada Naftalan neftinin təqdimatı böyük maraqla qarşılanıb

Noyabrın 11-13-də Cənubi Koreya Respublikasının paytaxtı Seulda turizm liderlərinin forumu, ayın 15-dən 23-dək isə turizm liderlərinin təlim proqramı keçirilib.

Bu tədbirlərdə ölkəmiz də təmsil olunub. «New Baku Hotel»in baş meneceri Ceyhun Aşurov, «Ariva Hotel»in baş meneceri Azad Əhmədov və «SW Travel»in departament rəhbəri Nihat Zalıyev Mədəniyyət və Turizm Nazirliyinin tövsiyəsi ilə forum və təlim proqramında iştirak ediblər.

Səfər təəssüratlarını qəzetimizlə bölüşən Ceyhun Aşurovun sözlərinə görə, foruma 20 ölkədən 100-dən artıq nümayəndə qatılıb. «Mədəni turizm və kreativ turizmdə yeni trendlər» mövzulu tədbirdə dünyada və Koreyada bu istiqamətdə tətbiq olunan yeniliklər müzakirə olunub: «Forum nümayəndələri öz ölkələrinin turizm imkanları barədə təqdimat etdilər. Azərbaycanla bağlı məruzə etmək mənə həvalə olunmuşdu. Ölkəmizdə turizmin inkişaf perspektivləri, hazırda görülən işlər, infrastruktur, mədəni turizm imkanlarımız və s. barədə geniş təqdimat etdim. Səfər çərçivəsində Cənubi Koreyanın Deagu, Gumi, Gyeongsan, Busan, Gyeongju, İncheon şəhərlərində də olduq, bu ölkədə turizmin inkişafı ilə tanış olmaq imkanı əldə etdik».

Səfər çərçivəsində forumun iştirakçıları Gyongsan şəhərində yerləşən Yeungnam Universitetində keçirilən təlimlərin dinləyiciləri olub, müxtəlif mövzularda mühazirələri dinləyiblər. Həmsöhbətimiz deyir ki, təlimlər turizm sahəsində brendləşmə, ölkələrdə regional turizm inkişafı, əhalinin bu sahə üzrə maarifləndirilməsi, dövlətlə özəl sahənin əməkdaşlığı kimi vacib məsələlərə həsr olunmuşdu: «Təlimlərin sonunda nümayəndələr dinlədikləri mühazirələr əsasında öz ölkəsinə uyğun təqdimatlar hazırladı. Biz təqdimatımızda Naftalan nefti barədə məlumat verdik, onun turizm məhsulu kimi əhəmiyyətindən danışdıq. Təqdimat böyük maraqla qarşılandı. İştirakçıların bəziləri Azərbaycan haqqında məlumatları ilk dəfə bizdən eşidirdi. Onlara ölkəmizdə turizmin müxtəlif növlərinin inkişafı, qış və müalicə turizmi imkanları haqqında geniş məlumat verdik. Səfər zamanı təkcə Cənubi Koreyanın deyil, forum və təlimlərdə iştirak edən ölkələrin də mədəniyyəti, turizm potensialı barədə məlumat aldı, həmçinin də Azərbaycan haqqında onları məlumatlandırdıq. Forumun bağlanış günü ölkəmizin Seuldakı səfirliyinin birinci katibi Fərrux Cumayev də bizimlə birlikdə oldu. Fürsətdən istifadə edib qəzetiniz vasitəsilə ona öz təşəkkürlərimi bildirirəm».

Ceyhun Aşurov Cənubi Koreyanın turizm imkanlarından da söz açdı. Onun sözlərinə görə, bu ölkənin okeana yaxın ərazilərində çimərlik turizmi çox inkişaf edib. Ümumiyyətlə isə, ölkədə MİCE (işgüzar) turizminin inkişafına xüsusi diqqət ayrılır: «Bu sahəyə böyük investisiyalar qoyulur. Hazırda Cənubi Koreya beynəlxalq konfranslara, forumlara ev sahibliyi edir. Onu da qeyd edim ki, bundan çox böyük qazanc əldə edirlər. Tibbi turizm də inkişaf edib. Regionun əksər ölkələrinin vətəndaşları müalicə üçün məhz Cənubi Koreyaya gəlirlər. Çünki burada kosmetik, estetik tibbi cərrahiyyə yüksək səviyyədədir».

Fəxriyyə Abdullayeva

Mədəniyyət.- 2014.- 5 dekabr.- S. 9.