Musiqi, incəsənət və rəssamlıq məktəbləri rəhbərlərinin zona müşavirəsi

Mədəniyyət və Turizm Nazirliyinin iş planına müvafiq olaraq uşaq musiqi, incəsənət və rəssamlıq məktəblərində tədris işinin təşkili ilə bağlı zona müşavirələri keçirilir. Bununla əlaqədar Gəncə şəhərində nazirliyin, Gəncə Şəhər Mədəniyyət və Turizm İdarəsi əməkdaşlarının, Gəncə şəhər, Daşkəsən, Göygöl, Samux, Kəlbəcər rayon uşaq musiqi, incəsənət və rəssamlıq məktəblərinin direktorları və tədris işləri üzrə direktor müavinlərinin iştirakı ilə zona müşavirəsi keçirilib.

Müşavirədə Azərbaycan Respublikası Nazirlər Kabinetinin aidiyyəti qərar və sərəncamlarının, Mədəniyyət və Turizm Nazirliyinin əmr və kollegiya qərarlarının, habelə uşaq musiqi, incəsənət və rəssamlıq məktəblərinin fəaliyyətini tənzimləyən digər normativ sənədlərin, uşaq musiqi, incəsənət və rəssamlıq məktəblərinin nümunəvi əsasnaməsi, tədris planları, tədris proqramlarının tələb və müddəaları ilə bağlı zəruri məlumatlar və izahatlar verilib.

Bununla yanaşı, bədii təhsilin inkişafı, gənc nəslin estetik tərbiyəsi, pedaqoji işçilərin peşəkarlıq səviyyəsinin yüksəldilməsi, istedadlı uşaqların üzə çıxarılması, onların yaradıcılıq imkanlarının inkişaf etdirilməsi üçün əlverişli şəraitin yaradılması və s. məsələlər ətrafında da fikir mübadiləsi aparılıb.

Tədbirdən sonra iştirakçılar şəhərin mərkəzində 2014-cü ildə istifadəyə verilmiş Gəncə şəhər Uşaq İncəsənət Məktəbinin və Uşaq Yaradıcılıq Mərkəzinin tədris korpusunda olub və burada tədris prosesini izləyiblər.

Mədəniyyət.- 2014.- 10 dekabr.- S. 5.