Hüseyn Cavidin ev-muzeyində dahi rəhbərin anım mərasimi

Dekabrın 11-də Hüseyn Cavidin ev-muzeyində ulu öndər Heydər Əliyevin vəfatının 11-ci ildönümü ilə əlaqədar anım mərasimi keçirilib.

Tədbirdə muzeyin direktoru, filologiya elmləri doktoru Gülbəniz Babaxanlı ümummilli liderin şərəfli ömür yolundan və fəaliyyətindən söhbət açıb. Diqqətə çatdırılıb ki, ulu öndər zəngin siyasi fəaliyyəti boyu digər sahələrlə yanaşı, ədəbiyyatımızın görkəmli nümayəndələrinin yubileylərinin keçirilməsi, xatirələrinin əbədiləşdirilməsi, əsərlərinin nəşri, təbliği, ədəbi prosesin inkişafı üçün böyük işlər görüb.

Muzeyin elmi fondlar şöbəsinin müdiri Cəmilə Rzayeva ulu öndərin Hüseyn Cavid irsinə qayğısından danışıb. Vurğulanıb ki, Hüseyn Cavid sənətinə böyük maraq göstərən ümummilli lider dahi sənətkarın irsinə layiqli qiymətin verilməsi üçün əvəzsiz xidmətlər göstərib.

1982-ci ilin oktyabrında ulu öndərin tapşırığı ilə Hüseyn Cavidin nəşinin Sibirdən Azərbaycana gətirilməsində iştirak etmiş Həmid Cəfərov həmin hadisəni xatırlayaraq Heydər Əliyevin yüksək etimadını doğrultduğu üçün qürur duyduğunu deyib.

Mədəniyyət.- 2014.- 12 dekabr.- S. 3.