Firəngiz Əlizadə “Grammy” mükafatına namizəd göstərilib

Beynəlxalq “Grammy” mükafatına “Klassik musiqi” nominasiyasında namizədlərin adları açıqlanıb. Azərbaycan musiqi ictimaiyyəti üçün çox əlamətdar hadisədir ki, üç namizəddən biri Azərbaycan Bəstəkarlar İttifaqının sədri, Xalq artisti, professor Firəngiz Əlizadədir.

“Grammy” mükafatı musiqi sahəsində dünyanın ən məşhur mükafatı sayılır və “Oskar”ın musiqi variantı hesab edilir. Bəstəkarlar İttifaqından bildirilib ki, ilk dəfə Azərbaycan bəstəkarı bu mötəbər mükafata nominant göstərilir. “Grammy” mükafatına “Klassik musiqi” nominasiyasında digər iki namizəd amerikalı Lera Auerbax və dünyanın bir çox ölkəsində səhnəyə qoyulan “Anna Frankın gündəliyi” operasının müəllifi Meçislav Vaynberqdir.

Bu xəbərə münasibət bildirən Firəngiz Əlizadə deyib: “Bu üç namizəddən biri olmaq mənim üçün böyük uğurdur. Bu mükafatı almağa nə qədər şansımın olduğunu deyə bilmərəm, lakin 2015-ci il fevralın 8-də keçiriləcək təqdimat mərasiminə artıq dəvət almışam. Mənim üçün əlamətdar məqam odur ki, bu ali mükafata məşhur amerikalı skripkaçı, meqa-star Hillari Hanın “Deutsche Grammofon”da işıq üzü görən, musiqilərimdən ibarət alboma görə namizəd göstərilmişəm”.

Mədəniyyət.- 2014.- 17 dekabr.- S. 4.