Xalq artisti Sevda İbrahimovanın 75 illiyi qeyd edildi

Dekabrın 18-də Azərbaycan Dövlət Filarmoniyasında tanınmış bəstəkar, Xalq artisti, professor Sevda İbrahimovanın 75 illiyinə həsr edilmiş yubiley gecəsi keçirildi.

Gecədə çıxış edən Bəstəkarlar İttifaqının katibi, professor Zemfira Qafarova yubilyarın həyat və yaradıcılığından söz açdı. Bildirildi ki, Sevda İbrahimovanı Azərbaycanın hüdudlarından kənarda da yaxşı tanıyırlar. Əsərləri ABŞ, Fransa, Almaniya, İsveçrə, Bolqarıstan və başqa ölkələrdə uğurla ifa olunub. Amerikalı dirijor Rikkardo Averbax Azərbaycanın Xalq artisti, skripkaçı Zəhra Quliyeva ilə birlikdə Sevda İbrahimovanın simli orkestr və skripka üçün yazdığı "Həyat bir pəncərədir" əsərini müxtəlif ölkələrdə uğurla ifa edib. Bəstəkarın orqan, soprano və bariton üçün "İthaf" poeması Kölndə, fortepiano və simli orkestr üçün "Konsertino"su Parisdə səslənib.

Yubiley gecəsində bəstəkarın dörd yeni əsəri - tar və orkestr üçün “Sənin üçün darıxıram, Şuşam”, violonçel, fortepiano və orkestr üçün “Etiraf” əsərləri, “Tez gəl” və “Laylay” mahnıları Xalq artisti Teymur Göyçayevin rəhbərliyi ilə Qara Qarayev adına Azərbaycan Dövlət Kamera Orkestrinin ifasında təqdim olundu. Solistlər Əməkdar artist Sahib Paşazadə və Aleksey Miltıx idi. Konsertdə həmçinin Əməkdar artist Fəridə Məmmədova, beynəlxalq müsabiqələr laureatı Səidə Tağızadə, Xalq artisti Zəhra Quliyeva bəstəkarın əsərlərini ifa etdilər. Sonda Xalq artisti Murad Adıgözəlzadə bəstəkarın ona həsr etdiyi fortepiano və orkestr üçün 5 saylı konsertini səsləndirdi.

Lalə

Mədəniyyət.- 2014.- 19 dekabr.- S. 2.