Yeni ili harada və necə qeyd etməli?

İmkanlı vətəndaşlar üçün səfər və əyləncə paketləri

Yeni ilin gəlişi dünya turizm təqvimində müxtəlif səyahətlər, rəngarəng turlarla zəngin bir dövrdür. Azərbaycanda da turizm şirkətləri Yeni il tətili ilə bağlı maraqlı turpaketlər, hotel və restoranlar isə mənalı istirahət və əyləncə imkanları təklif edirlər. Təbii ki, bu təkliflər daha çox imkanlı vətəndaşlarımıza aiddir. Biz də oxucular üçün maraqlı olar deyə, bu xüsusda araşdırma apardıq, maraqlı nəticələr əldə etdik.

Azərbaycanda istirahət ildən-ilə populyarlaşır

Əvvəlcə onu qeyd edək ki, istər Azərbaycanda, istərsə də xarici ölkələrdə dincəlmək istəyənlər öncədən turpaket almaqla müəyyən məbləğə qənaət etmiş olurlar. Bunu bizimlə söhbətində turizm şirkətlərinin rəhbərləri də qeyd etdilər. «İnturist Travel» şirkətinin icraçı direktoru Lətifə Əliyevanın sözlərinə görə, Azərbaycanda istirahət ildən-ilə daha da populyarlaşır. Əvvəllər ölkənin şimal-qərb regionlarına daha çox sifariş vardısa, bu ildən cənub və qərb bölgəsinə də getmək istəyənlər çoxalıb. Qəbələ, İsmayıllı, Qusar və Qax rayonları isə daha çox sifariş olunan məkanlardır.

Artıq ikinci ildir ki, Azərbaycanın daha çox diqqət mərkəzində olan qış istirahət məkanları sırasına «Şahdağ» və «Tufandağ» kompleksləri də əlavə olunub. Bu məkanlarda turların qiyməti istirahətin müddətindən və hoteldən asılı olaraq dəyişir.

Qış mövsümünə dekabrın 20-dən start verilən «Şahdağ»da ötən illə müqayisədə bu il qiymətlərdə dəyişiklik olmayacaq. Bunu bir qədər əvvəl jurnalistlərə müsahibəsində mədəniyyət və turizm naziri Əbülfəs Qarayev də diqqətə çatdırmışdı. Yeri gəlmişkən, Mədəniyyət və Turizm Nazirliyinin Turizm şöbəsi “Şahdağ” Qış-Yay Turizm Kompleksi İdarəsi ilə birlikdə qış turizm mövsümü ilə əlaqədar turizm şirkətlərinin nümayəndələri üçün xüsusi treninqlər təşkil edib. Treninqlər kompleksdə turistlərin qəbul prosedurunun daha da operativ təşkili (xizək sürməyə gələnlərin geyim ölçüləri barədə turizm şirkətləri tərəfindən qabaqcadan kompleksə məlumat verilməsi və s.) məqsədilə keçirilib.

Azərbaycanın dağ-xizək mərkəzlərinə turist aparan şirkətlərin əməkdaşları bizimlə söhbətdə bu məqamları nəzərə aldıqlarını bildirdilər. «Atlas Travel» şirkətinin daxili turizm departamentinin müdiri Şamo Əliyevin sözlərinə görə, dekabrın 28-də «Şahdağ»a təşkil ediləcək turun qiyməti 20 manatdır. Buraya nəqliyyat, bələdçi xidmət, qidalanma, avtobusda su və şirniyyat, professional fotosessiya daxildir. Tur zamanı kanat yollarından istifadə 08:00-dan 16:30-dək 25 manat, 08:00-dan 12:30-dək və 12:30-dan 16:30-dək isə 15 manatdır. Bu qiymətə istənilən kanat yolundan istənilən qədər istifadə etmək olar. 1 dəfə istifadə isə böyüklər üçün 10, uşaqlar üçün 6 manatdır. Kompleksdə xizək yollarına aparan 3 kanat istifadədədir və bir ödənişlə hər üç kanat yolundan da istifadə etmək olar. Növbəsiz xizək kirayələmək istəyən turistlər turun başlamasına 3 gün qalmışadək ad, soyadı, boy, çəki, ayaq ölçüsü və doğum tarixlərini bildirməli və ödəniş etməlidir. Xizək kirayə qiyməti 20 manat təşkil edir. Xizəkdən istifadə qiyməti vaxta görə bölünmür, yəni 1 saatlıq və ya 1 günlük qiymət eynidir.

«Şahdağ»da hoteldə qalmaqla birlikdə 4 günlük tur isə 410 manata başa gəlir. Bundan başqa, Quba (4 günlük tur 265 manatdan başlayır) və Şamaxı (5 ulduzlu hoteldə qalmaqla, 4 günlük tur 600 manata) turları da bu il populyar olan istiqamətlər sırasındadır.

Türkiyə və Dubayın sırasına bu il Praqa da əlavə olunub

Bayram tətili günlərində xarici ölkələrdə istirahəti tərcih edənlər də az deyil. Azərbaycan Turizm Assosiasiyası (AZTA) idarə heyətinin sədri Nahid Bağırovun sözlərinə görə, sentyabrda AZAL-ın Bakı-Nyu York birbaşa aviareysinin açılmasından sonra Amerikaya maraq artıb. Asiya ölkələrindən isə azərbaycanlı turistlər əsasən Sinqapur, Tailand və Malayziyaya üstünlük verirlər. Bununla belə, azərbaycanlı turistlər arasında populyarlığına görə birincilik yenə də Türkiyə və Dubaya məxsusdur, daha sonra Avropa ölkələri gəlir.

Xarici ölkələrə təşkil edilən turların qiymətlərinə gəlincə, Dubaya həftəlik turların qiyməti 700 manatdan (aviabiletlə birlikdə 999 manat), İstanbula 550 manatdan (aviabiletlə uçuşla 739 manat), Türkiyənin dağ-xizək mərkəzi olan Uludağa 800 manatdan (aviabilet də daxil), Gürcüstanın Bakuriani kurortuna 6 günlük tur 460 manatdan (qalmaq və gündə üç dəfə yeməklə) başlayır.

Avropaya Yeni il turlarının qiyməti isə istiqamətdən asılı olaraq dəyişir. Məsələn, Praqaya 8 günlük tur 960 manatdan (aviabiletlə 1232 manat), Barselonaya 6 günlük tur 590 manatdan (ikiotaqlı nömrədə qalmaq, səhər yeməyi, bələdçi ilə ekskursiya, muzeylərə giriş bileti, Yeni il şam yeməyi ilə), Romaya 5 günlük tur isə 450 manatdır. Parisə turlar aviabilet də daxil olmaqla, 1100 manatdan başlayır. İsveçrənin dağ-xizək kurortları (uçuşsuz 1200 manatdan) və London (2000 manatdan) səyahəti daha bahadır.

Yeni ili isti havada və dəniz sahilində qarşılamaq istəyənlər üçün İndoneziyanın Bali adasına (5 ulduzlu hoteldə qalmaq, səhər yeməyi və viza dəstəyi daxil olmaqla 1100 manatdan), Tailanda (850 manatdan), Misirə (615 manatdan, hoteldə yerləşdirmə və səhər yeməyi), habelə Sinqapur və Malayziyaya həftəlik qrup turları (aviabilet, 5 ulduzlu hoteldə yerləşdirmə 1780 manat) səfər edə bilərlər.

Hotellərdə Yeni il şənlikləri

Azərbaycanın hotel və istirahət mərkəzlərinin Yeni illə əlaqədar hazırladığı xüsusi paketlərin sayı və çeşidi ötən ilə nisbətən daha çoxdur. Dekabrın 31-də «Jumeirah Bilgah Beach Hotel»də Yeni il gecəsi üç yerdə - «Bilgah Ballroom», «Yuukai» restoranlarında və «Equinox Night Club»da təşkil ediləcək. «Bilgah Ballroom»da Yeni il şənliyində iştirak etmək üçün arxa, orta, ön hissələrə görə, müvafiq olaraq biletlərin qiyməti 300, 350 və 400 manatdır. «Yuukai» restoranında bayram keçirmək istəyənlər yerlərdən 200-300 manat ödəməlidirlər. «Equinox Night Club»da keçiriləcək Yeni il şənliyinə qatılmaq üçün isə standart biletlər 50 manat, VİP biletlər 150 manat təşkil edir.

«Fairmont Baku» hotelində o qədər də dəbdəbəli Yeni il şənliyi nəzərdə tutulmur. Hoteldən verilən məlumata görə, burada Yeni il şənliyi iki restoranda təşkil ediləcək. «Le Bistro» restoranında fransız mətbəxinə aid 6 çeşiddə şam yeməyi və canlı musiqi daxil olmaqla biletin qiyməti 79 manat, «Alov Steakhouse»da isə 6 çeşiddə dəniz məhsullarından ibarət şam yeməyi və canlı caz musiqisi 149 manatdır.

Yeni ili «Kempinski Badamdar» hotelində qeyd etmək 70-195 manata başa gələcək. Qonaqlara 6 çeşiddə Azərbaycan və Avropa mətbəxinə aid yeməklər təqdim olunacaq. Yeni il gecəsi şənlik iştirakçıları arasında lotereya oynanılacaq və hədiyyələr veriləcək. Bahalı hədiyyələrə Rusiya və Avropa ölkələrində yerləşən «Kempinski» hotellərində istirahət kuponu daxildir. «Kempinski Hotel» öz qonaqları üçün daha bir güzəşt təqdim edir. Belə ki, adi günlərdə hoteldə gecələmək 230 manat olduğu halda, dekabrın 31-dən yanvarın 1-nə keçən gecə 2 nəfərlik 1 otaq üçün qiymət 99 manat olacaq. Bura səhər yeməyi və SPA da daxildir.

2015-ci ili qarşılamaq üçün ən maraqlı məkanlardan biri «Hilton Baku»dur. Burada Yeni ilin gəlişini «360 Bar» və «Sky Griyll» restoranlarında qeyd etmək mümkün olacaq. Hotelin 25-ci mərtəbəsində yerləşən «360 Bar»da şənliyə qatılmaq 250 manatdır. «Sky Griyll»də isə Yeni il keçirmək 140 manatdır. 6 yaşa qədər uşaqlar pulsuz, 12 yaşa qədər uşaqlara isə 50 faiz endirim nəzərdə tutulub. Hotelin 24-cü mərtəbəsində yerləşən restoranda instrumental ansamblın ifasında canlı musiqi gecəni müşayiət edəcək.

Ən bahalı Yeni il şənliklərindən biri «Abşeron Marriott» hotelində keçiriləcək. Hotelin Şərq zalında keçiriləcək şənlikdə iştirak etmək üçün yerlərdən asılı olaraq biletlərin qiyməti 350, 400 və 500 manat təşkil edir. Gecənin qonaqları avropalı müğənnilər - Kad Deluna, Reydis, Saşa Lopez, Elli Black olacaq. Bundan əlavə, biletə Avropa və milli mətbəxə aid yeməklər və limitsiz içki daxildir. Dekabrın 31-də «Marriott Abşeron» hotelində gecələmək istəyən qonaqlara endirim də nəzərdə tutulub. Adi günlərdə 265 manata təklif edilən 2 nəfərlik nömrədə gecələmək Yeni il gecəsi 160 manat olacaq. Hotelin «Zest» restoranında isə dj-lərin iştirakı və Avropa mətbəxinə aid yeməklər daxil olmaqla, biletin qiyməti 52 manatdır. «Fireworks» restoranında isə Yeni ili açıq bufetdə olan milli xörəklərdən dadaraq saksafonun ifası ilə qeyd etmək istəyənlər 100 manatlarından keçməli olacaqlar. Spirtli içkilər biletə daxil deyil.

«Four seasons» hotelində Yeni il şənliyi təşkil edilməsə də, hotelin restoranlarında Yeni il menyuları təklif edilir. Bundan əlavə, qonaqlar italyan müğənni Federiko Spaqnolinin canlı ifalarını da dinləyə biləcəklər. «Zəfəran» restoranında biletin qiyməti 75, “Kaspia” restoranında 140 manatdır. Biletə 4 növ Avropa mətbəxinə aid yeməklər və bir qədəh şampan daxildir.

* * *

Beləliklə, apardığımız araşdırma və gəldiyimiz nəticəyə əsasən deyə bilərik ki, maddi imkanı olanları həm ölkə daxilində, həm də xaricdə maraqlı əyləncələr gözləyir.…

Fəxriyyə Abdullayeva

Mədəniyyət.- 2014.- 24 dekabr.- S. 9.