Bişkekdə “Azərbaycan günü

 

Azərbaycanın Qırğızıstandakı səfirliyi və Qırğız-Türk “ManasUniversitetinin təşəbbüsü ilə Dünya Azərbaycanlılarının Həmrəylik Günü münasibətilə Bişkekdə “Azərbaycan günükeçirilib.

 

Əvvəlcə iştirakçılar universitetin foyesində Azərbaycanın tarixi, mədəniyyəti, turizm potensialı, ölkəmizin inkişafı və Dağlıq Qarabağ münaqişəsinə dair kitab sərgisi ilə tanış olublar. Həmrəylik Günündən bəhs edən sənədli film nümayiş etdirilib.

Universitetin rektoru Səbahattin Balcının açılış nitqindən sonra Azərbaycanın Qırğızıstandakı səfiri Hidayət Orucov Dünya Azərbaycanlılarının Həmrəylik Gününün tarixi haqqında məlumat verib. Bildirilib ki, bu gün dünyada 50 milyon azərbaycanlı yaşayır. Xaricdə yaşayan soydaşlarımızın problemləri Azərbaycan Prezidenti İlham Əliyevin diqqət mərkəzindədir. Qeyd edilib ki, Azərbaycan ilə Qırğızıstan arasında münasibətlər siyasi, iqtisadi, humanitar və digər sahələrdə inkişaf etməkdədir.

Qırğızıstan xarici işlər nazirinin müavini Erines Otorbayev, Jokorku Keneşinin deputatı, Qırğızıstan-Azərbaycan parlamentlərarası dostluq qrupunun sədri Kurmanbek Dıykanbayev, Özbəkistanın bu ölkədəki səfiri Komil Rəşidov, “Azəri” İctimai Birliyinin sədri Əziz Əliyev, Qırğız-Türk “ManasUniversitetinin prorektoru Asılbek Kulmırzayev və başqaları çıxış edərək dünya azərbaycanlılarını bayram münasibətilə təbrik ediblər. Mərasim konsert proqramı ilə başa çatıb.

 

Mədəniyyət.- 2014.- 26 dekabr.- S. 2.