Filarmoniyada təsviri sənət və musiqi axşamı

Gənclər Gününə həsr edilmiş “Gəncliyin səsi” festivalı çərçivəsində daha bir təsviri sənət və musiqi axşamı yanvarın 31-də Müslüm Maqomayev adına Azərbaycan Dövlət Filarmoniyasında gerçəkləşdi.

Filarmoniyanın foyesində gənc rəssamların əl işləri sərgilənirdi. Sərgidə Aqşin Kazımov, Nizar Məmmədov və Turan Muxtarzadənin 20-yə yaxın rəsmi nümayiş olunurdu. Müxtəlif janrlarda çəkilmiş rəsmlər tamaşaçıların böyük marağına səbəb oldu.

Sonra Xalq artisti Rauf Abdullayevin bədii rəhbərliyi və dirijorluğu ilə Üzeyir Hacıbəyli adına Azərbaycan Dövlət Simfonik Orkestrinin ifasında konsert proqramı təqdim edildi.

Konsertdə əvvəlcə gənc musiqiçilər Tural Əliyev və Röya Hüseynovanın simfonik poemaları ifa olundu. Bu əsərlər ilk dəfə səsləndirilirdi. Proqramda həmçinin Georq Nerudanın “Truba və orkestr üçün konsert”, David Popperin “Tarantella”, Edvard Qriqin “Piano və orkestr üçün konsert. I hissə”, Sesil Forsaytın “Alt və orkestr üçün konsert. I hissə”, Jül Demerssmanın “Fleyta və orkestr üçün 6 saylı konsert”i səsləndirildi.

Konsertin solistləri beynəlxalq müsabiqələr laureatları Nəcəf Vəliyev (truba), Ağarəhim Quliyev (fleyta), Məsumə Dadaşova (piano), Murad İbrahimov (violonçel) və Ziba Rəcəbli (viola) idilər. Musiqi axşamı tamaşaçılar tərəfindən alqışlarla qarşılandı.

Fariz Hüseynov

Mədəniyyət.- 2014.- 5 fevral.- S. 9.