Dövlət Proqramının icrası ilə bağlı müşavirə keçirilib

 

İclasda tarixi abidələrin pasportlaşdırılması məsələləri də müzakirə edilib

 

Fevralın 13-də «Azərbərpa» Elmi-Tədqiqat Layihə İnstitutunda mədəniyyət və turizm naziri Əbülfəs Qarayevin iştirakı ilə «Daşınmaz tarix və mədəniyyət abidələrinin bərpası, tarix və mədəniyyət qoruqlarının fəaliyyətinin təkmilləşdirilməsi və inkişafına dair 2014-2020-ci illər üzrə Dövlət Proqramı»nın icrasına həsr olunmuş müşavirə keçirilib. Dövlət Proqramı Azərbaycan Respublikası Prezidentinin 27 dekabr 2013-cü il tarixli sərəncamı ilə təsdiq edilib.

İclasda mədəniyyət və turizm nazirinin birinci müavini Vaqif Əliyev, nazirliyin Mədəni irs şöbəsinin müdiri Rüfət Nuriyev, Tikilən obyektlərin birləşmiş müdiriyyətinin baş mühəndisi Zöhrab Pirimov, «Azərbərpa» Elmi-Tədqiqat Layihə İnstitutunun direktoru Telman Kərimli və digər aidiyyəti şəxslər iştirak edib.

Nazir Əbülfəs Qarayev proqramda əksini tapan müddəaların icrası ilə maraqlanıb, görüləcək işlər barədə tövsiyələrini verib. Qeyd olunub ki, fevral ayının sonuna qədər nazirliyin Mədəni irs şöbəsi və «Azərbərpa» Elmi-Tədqiqat Layihə İnstitutu bu istiqamətdə öz təkliflərini hazırlayıb təqdim edəcək. Martın əvvəllərində isə Dövlət Proqramının təqdimatı keçiriləcək.

İclasda müzakirə edilən məsələlərdən biritarixi abidələrin pasportlaşdırılması olub. Bu məsələ Dövlət Proqramında əksini tapıb. Ölkəmizdə ilk dəfə beynəlxalq standartlara uyğun olaraq tarixi abidələrin pasportları Azərbaycan dilində hazırlanır. Sovet dövründə 1000-ə yaxın abidənin pasportu rus dilində tərtib edilib. Hazırda 64 abidənin pasportu tam hazırdır, 34 abidə ilə bağlı davam edir. Pasport iki hissədən ibarət olacaq. Birinci hissədə abidənin yerləşdiyi ərazi, coğrafi koordinatları və aparılan bərpa işləri haqqında məlumat veriləcək. İkinci hissəsi qeydiyyat vərəqindən ibarət olacaq. Burada Azərbaycan, ingilisrus dillərində abidənin tarixi, bərpası haqqında məlumat veriləcək. Pasport məlumatları Mədəniyyət və Turizm Nazirliyinin saytında yerləşdiriləcək.

Pasportlaşma ilə bağlı məlumatları dinləyən nazir bu istiqamətdə müvafiq tapşırıqlar verib.

Toplantıda «Azərbərpa» Elmi-Tədqiqat Layihə İnstitutunun maddi-texniki bazasının möhkəmləndirilməsi də müzakirə olunub.

 

Fəxriyyə Abdullayeva

 

Mədəniyyət.- 2014.- 14 fevral.- S. 4.