“Çoxlu
sayda küveytli Azərbaycana
gəlmək istəyir”
“Azərbaycanın
çox gözəl, cəlbedici təbiəti
var. Birbaşa aviareyslərin
olması turist səfərlərinə imkan yarada bilər”
Azərbaycanın müstəqilliyinin ilk illərindən tarix, din və mədəni köklərlə bağlı olduğumuz İslam dünyası, o cümlədən ərəb ölkələri ilə əlaqələrin inkişaf etdirilməsi xarici siyasətin prioritet istiqamətlərindən olub. Respublikamızın sıx əməkdaşlıq etdiyi müsəlman ölkələrindən biri də Küveytdir. Hazırda iki ölkə arasında müxtəlif sahələrdə əlaqələr inkişaf etməkdədir. Küveytin Azərbaycana yeni təyin olunmuş səfiri Səud Əbdüləziz Məhəmməd əl-Şəmlan əl-Rumi ilə müsahibəmiz bu ölkənin milli bayramı (26 fevral - Azadlıq Günü) ərəfəsinə təsadüf etdi. Onunla söhbətimizdə ölkələrimiz arasında münasibətlərin bir sıra istiqamətlərinə toxunduq. Diplomat əvvəlcə ölkəsinin milli bayramı barədə danışdı:
- Bu günü biz üç hadisə münasibətilə qeyd edirik. Birinci hadisə 1961-ci ildə Küveytin öz müstəqilliyini qazanmasıdır. 53 il əvvəl Küveyt müstəqil dövlət oldu. 1990-cı ildə Səddam Hüseyn rejimi Küveyti işğal etdi. 1991-ci ilin fevralında Küveyt xalqı dostların köməyi ilə İraq hərbi qüvvələrinin işğalından azad oldu. Bundan əlavə, biz bu günlər Küveytin indiki dövlət başçısı Əlahəzrət şeyx Sabah əl-Əhməd əl-Cabir əs-Sabahın hakimiyyətə gəlməsinin (2006) ildönümünü də qeyd edirik.
- Azərbaycan-Küveyt əlaqələrinin hazırkı səviyyəsini necə qiymətləndirirsiniz?
- Ölkələrimiz arasında əlaqələr ildən-ilə güclənir və daha da aktivləşir. Bizi Azərbaycanla çox yüksək səviyyədə əlaqələr bağlayır. Xalqlarımız eyni dinə inam gətirir. 90-cı illərdən bəri Bakıda Küveytin Asiya İslam Təşkilatı fəaliyyət göstərir. Bu qurum Küveytin Vəqflər və Dini İşlər Nazirliyinin nəzarəti altında işləyir. 90-cı illərdə Asiya İslam Təşkilatı Azərbaycanda qaçqınlara və məcburi köçkünlərə yardımlarla bağlı çox fəal şəkildə iştirak edib. İqtisadi əlaqələr barədə danışarkən qeyd etməliyəm ki, bu günlərdə Azərbaycanın iqtisadiyyat və sənaye naziri Şahin Mustafayevlə görüşdə bır sıra məsələləri müzakirə etdik. Biz xüsusilə hər il Küveytdə keçirilən böyük sərgilərdən danışdıq və Azərbaycan şirkətlərinin, iş adamlarının bu sərgilərdə iştirakını arzu etdiyimizi bildirdik. Onu da qeyd etməliyəm ki, bizim öz əlaqələrimizi genişləndirmək və daha da fəallaşdırmaq üçün mühüm hüquqi baza mövcuddur. Dövlətlər arasında bir çox sahələr üzrə müqavilələr var ki, onların əsasında əməkdaşlığımızı inkişaf etdirə bilərik. Azərbaycanın dövlət başçısı bir neçə il bundan əvvəl Küveytə səfər etdi və bu çox faydalı oldu. Bu yaxınlarda bizim səylərimizlə ölkəmizin ən yüksək dövlət xadimlərindən biri Azərbaycana səfər edəcək. Keçən il Baş nazirin müavini və xarici işlər nazirinin rəhbərlik etdikləri böyük nümayəndə heyəti hökumətlərarası əməkdaşlıq komissiyasının ikinci iclası çərçivəsində Azərbaycanda olmuşdu və bu toplantı zamanı bir sıra razılaşmalar əldə edildi. Küveytin Azərbaycandakı səfiri kimi bu gün əsas məqsədim bütün sahələrdə əlaqələrimizi daha yüksək səviyyəyə qaldırmaqdır.
- Ölkələrimiz arasında mədəni əlaqələr haqqında nə demək olar? Azərbaycana gələnə qədər onun tarixi, mədəniyyəti haqqında nə dərəcədə məlumatlı idiniz?
- Qeyd edim ki, buraya gələnə qədər Azərbaycan haqqında çox informasiyaya malik deyildim. Bundan öncə Argentinada səfir kimi fəaliyyət göstərirdim və Azərbaycanın oradakı müvəqqəti işlər vəkili ilə görüşlərimizdə ölkənizlə bağlı müəyyən qədər məlumat ala bilmişdim. Bura gəlməzdən öncə Azərbaycanın belə inkişaf etmiş bir ölkə olduğunu da, açığı, təsəvvür etmirdim. Azərbaycan bu regionun öz təbii sərvətləri ilə zəngin iqtisadiyyata malik çox mühüm dövlətidir. Dostlarımla söhbət edərkən mənə deyirlər ki, bu gözəllik və firavanlıq ildən-ilə artacaq. İnsanlarınız çox istiqanlıdır. Ölkədə sabitlik və əmin-amanlıq hökm sürür. Mədəni əlaqələrə gəlincə, bu, ikitərəfli münasibətlərimizin mühüm bir istiqamətini təşkil edir. Son illər qarşılıqlı mədəniyyət günlərinin keçirilməsi xoş ənənə halını alıb və bu, münasibətlərimizə öz töhfəsini verir. 2011-ci ilin mayında və 2013-cü ilin fevralında Küveytdə Azərbaycan mədəniyyəti günləri gerçəkləşib. 2012-ci ilin noyabrında isə Azərbaycanda Küveyt mədəniyyəti günləri keçirilib. Küveytin mədəniyyət üzrə məsul, nazirlik səviyyəsində olan Ali Mədəniyyət Şurası Azərbaycanla əlaqələrə xüsusi önəm verir və bu tədbirlər gələcəkdə də davam edəcək. Azərbaycan mədəniyyət və turizm naziri Əbülfəs Qarayevlə görüşümdə bu istiqamətdə əməkdaşlığın perspektivlərini müzakirə etmək niyyətindəyəm. Coğrafi baxımdan yaxın olmağımıza və müsəlman ölkələri olmağımıza baxmayaraq, xalqlarımız biri-birlərinin mədəniyyəti haqqında kifayət qədər məlumata malik deyillər. Bunun üçün çoxsaylı qarşılıqlı görüşlər keçirmək lazımdır. Məsələn, mən istərdim ki, xalq folklor qruplarımız qarşılıqlı olaraq universitetlərdə tədbirlər təşkil etsinlər. Bu yolla əlaqələri genişləndirmək istəyirik. Qarşılıqlı mədəniyyət günləri isə ölkələrimizin xalqlarının bir-birinin mədəniyyəti ilə daha yaxından tanış olması üçün imkandır. İstəyirik ki, bu istiqamətdə fəaliyyətimizi daha da genişləndirək.
- Azərbaycanda olduğunuz müddətdə regionlarımıza səfər etmək imkanınız olubmu?
- Cəmi iki aydır
ki, Azərbaycandayam. Ona görə də hələlik belə imkanım olmayıb.
Amma onu deyim ki,
ilk səfər edəcəyim
bölgə Naxçıvan
olacaq. Mən Naxçıvan və
onun tarixi haqqında çox eşitmişəm. Bu səbəbdən birinci ora səfər edib, sonra başqa
regionlara da gedəcəyəm. Mən özüm
belə səfərlərə
çox əhəmiyyət
verirəm. Yerli əhali ilə tanış olmaq, görüşmək,
xalqla birbaşa təmasda olmaq fürsətini qiymətləndirirəm.
Bundan başqa sizin mədəniyyət, musiqi ilə çox yaxından tanış olmaq arzum var. Azərbaycan musiqisini dinləməyi, teatrlara getməyi çox istərdim. Ölkənizin
incəsənəti ilə
yaxından tanış
olmaq arzusundayam.
- İki ölkə
arasında turizm sahəsində əməkdaşlıq
perspektivlərini necə
dəyərləndirirsiniz?
- İki-üç il bundan əvvəl Küveytdən
Azərbaycana uzağı
30-40 nəfər turist
gəlirdi. Keçən
il Azərbaycanın
Küveytdəki səfiri
Tural Rzayevlə görüşərkən, o mənə
dedi ki, təkcə iyul-sentyabr ayları ərzində 720
nəfər küveytliyə
viza verib. Bunlar Azərbaycana gələn küveytli turistlərdir.
Küveytlilər ölkənizə 20-30 günlük sırf turizm məqsədilə gəlirlər. Azərbaycanın çox gözəl, cəlbedici təbiəti
var. Yeri gəlmişkən,
Azərbaycanın iqtisadiyyat
və sənaye naziri ilə görüşümüzdə bu barədə də danışdıq.
Xüsusilə vurğuladıq ki,
ölkələrimiz arasında
birbaşa hava reysi olsun. Aramızda təyyarə ilə 1-2 saatıq məsafə var.
Amma birbaşa uçuş olmadığına
görə burdan Qətərə və ya Dubaya, sonra
da Küveytə gedirik. Biz bu
məsələni bir
daha geniş şəkildə müzakirə
edəcəyik. Çünki hazırda çoxlu sayda küveytli Azərbaycana gəlmək
istəyir. Birbaşa aviareyslərin
olması turist səfərlərinə imkan
yarada bilər.
- Maraqlıdır, Küveyt
hansı turizm növü ilə azərbaycanlı turistləri
özünə cəlb
edə bilər?
- Küveyt kiçik ölkədir. Ölkəmizdə ticarət, kommersiya
turizmi inkişaf edib. Xüsusilə qeyd etmək
istərdim ki, Yaxın Şərqdə ən böyük ticarət mərkəzi paytaxt El-Küveytdə yerləşir və şəhərin bütün
sahil boyunu əhatə edir. Bizdə mallar da gömrük
rüsumundan azaddır
və çox ucuzdur. Məsələn, avtomobillərə, neft-kimya məsullarına vergi yoxdur. Küveyt dünyada yeganə ölkədir ki, burada əcnəbilərin
müalicəsi pulsuz həyata keçirilir.
Bu yaxınlarda bizə bir azərbaycanlı
xanım xəstəliyinə
görə müraciət
edib. Hazırda onun Küveytə
göndərilməsi və
orda müalicə alması ilə bağlı şəraiti
öyrənirik. Məsələn, mən səfir və siz azərbaycanlı
Küveytdə həkimə
getsək, orada bərabər dayanıb növbə gözləyəcəyik.
Bu, Küveytin qanunudur. Bizim ölkəmizdə ayrı-seçkilik yoxdur,
insanpərvərlik mövcuddur.
Hazırda İraqdan da
çox saylda xəstə Küveytə
müalicəyə gəlir.
Bizdə
tibb inkişaf edib, yüksək ixtisaslı həkimlər
fəaliyyət göstərir.
Eyni zamanda xaricdən yüksək ixtisaslı həkimlər müəyyən
müddətə ölkə
xəstəxanalarında işləmək
üçün dəvət
edilir.
- Şoppinq turizmindən
başqa Küveytdə
digər turizm növləri necə, inkişaf etdirilirmi?
- Ölkəmizdə qədim
dövrləri, o cümlədən
Osmanlı dövrünü
əhatə edən qədim mədəniyyət
abidələri var. Disneylənd
tipli şəhərciklər
də var ki, turistlər onlara maraq göstərirlər.
Eyni zamanda tariximizlə bağlı maddi mədəniyyət nümunələri
xüsusi muzeylərimizdə
nümayiş olunur.
Əlbəttə, bunlar da turistlərin diqqətini cəlb edir.
- Regionlarımıza hələlik
səfərə çıxa
bilməsəniz də,
yəqin ki, Bakı və onun ətrafını seyr etmək imkanınız olub? Milli mətbəximizlə
tanış ola bilmisinizmi?
- Tarixi abidələrə xüsusi marağım var.
Bakıda, İçərişəhərdə
gözəl abidələriniz,
Qız qalası xüsusilə çox xoşuma gəlib. Burada olduğumuz müddətdə Azərbaycan
mətbəxi ilə də yaxından tanış olmuşuq. Demək olar ki, bütün restoranlarda yerli mətbəxin dadına baxmışıq.
Mən özümlə Küveytdən
aşpazlar gətirmişəm.
Lakin istədik ki, ailəliklə Azərbaycan
mətbəxini də
dadaq. Ailə üzvlərim sizin
salat növlərini, turşuları, kababları
çox xoşlayır.
Ümumiyyətlə, mətbəxlərimiz arasında oxşarlıq çoxdur. Amma küveytlilər düyünü sizdən
daha çox xoşlayır. Bundan başqa,
Azərbaycan toylarında
iştirak etmək arzum da var. Biz küveytlilər digər xalqlarla münasibətlər
qurmağa meylliyik.
Düşünürəm ki, insanın
hər bir ölkəyə səfəri
zamanı əldə etdiyi ən qiymətli nemət dostluq olur. Mən bir müddət burda işləyəcəyəm
və sonra gedəcəyəm, əldə
etdiyim isə azərbaycanlı dostlarım
olacaq. Dostluq çox mühüm
amildir. Eyni zamanda arzu edək ki, qəzetinizlə
də davamlı əməkdaşlıq edək
və gələcəkdə
də öz təəssüratları sizinlə
bölüşüm.
Mehparə
Mədəniyyət.- 2014.- 26
fevral.- S. 10.