“Azərbaycanın mədəni irsinin qorunması və inkişafına dəstək”

Beynəlxalq Mətbuat Mərkəzində “ELS - Müstəqil Araşdırmalar Mərkəzi” İctimai Birliyinin “Azərbaycanın mədəni irsinin qorunması və inkişafına dəstək” layihəsinin təqdimatı olub. İctimai birliyin rəhbəri İradə Yaqubova Prezident yanında QHT-lərə Dövlət Dəstəyi Şurasının maliyyə yardımı ilə həyata keçirilən layihə barədə məlumat verib. Qeyd edilib ki, layihə çərçivəsində uşaq mahnılarının milli bazasının zənginləşdirilməsi məqsədilə “Yeni uşaq mahnıları - 2013” ümumrespublika müsabiqəsində qalib hesab edilmiş mahnıların not albomunun tərtib edilməsi, audiodiskin hazırlanması və Bakı və Sumqayıt şəhərlərinin uşaq bağçalarına paylanması nəzərdə tutulur.

Tədbirdə Azərbaycan bəstəkarlarının əsərlərinin geniş auditoriyada təbliği, musiqi əsərlərinin əlyazmalarının kitabxanalarda saxlanması, ümumtəhsil məktəblərinin ibtidai siniflərində musiqi və təsviri incəsənət fənlərini tədris edən müəllimlər üçün metodik ədəbiyyat hazırlanması məsələləri müzakirə edilib.

Mədəniyyət.- 2014.- 9 iyul.- S. 2.