Fransanın milli bayramı qeyd olunub

İyulun 14-də Fransanın Azərbaycandakı səfirliyi bu ölkənin milli bayramı - Bastiliyanın alınması günü münasibətilə rəsmi qəbul təşkil etdi.

Mərasimdə çıxış edən Fransanın Bakı böyükelçisi Paskal Mönye ölkəsinin keçdiyi inkişaf yolundan, Azərbaycanla ikitərəfli əlaqələrindən danışdı. Ölkələrimiz arasında siyasi, iqtisadi münasibətlərin, habelə elm, təhsil və mədəniyyət sahəsində əməkdaşlığın bundan sonra da genişlənəcəyinə əminliyini bildirdi.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova əlamətdar gün münasibətilə Azərbaycan Prezidenti İlham Əliyevin təbrikini, fransız xalqına sülh və firavanlıq arzularını çatdırdı. İki ölkə arasında əlaqələrin dərin tarixi kökləri olduğunu deyən komitə sədri bu əməkdaşlığın inkişafı üçün geniş hüquqi baza yaradıldığını qeyd etdi. Azərbaycanın birinci xanımı, Heydər Əliyev Fondunun prezidenti Mehriban Əliyevanın bu əlaqələrin inkişafında böyük xidmətlərini diqqətə çatdıran komitə sədri bildirdi ki, bu günlərdə Fondun təşkilatçılığı ilə Kann şəhərində Azərbaycan mədəniyyəti günlərinin keçirilməsi buna əyani sübutdur.

Tədbir ziyafət və konsert mərasimi ilə davam etdi.

Mehparə

Mədəniyyət. - 2014.- 16 iyul.- S. 4.