“Dəli Kür”ün Mələyi

Zemfira Sadıqovanın 75 illiyi qeyd edildi

İyulun 15-də Cəfər Cabbarlı adına “Azərbaycanfilm” kinostudiyasında Əməkdar artist Zemfira Sadıqovanın 75 illiyi qeyd edildi.

Tədbirdə çıxış edən kinostudiyanın direktoru Müşfiq Hətəmov aktrisanın yubileyinin bu məkanda keçirilməsinin simvolik məna daşıdığını bildirdi: “Çünki onun gəncliyi bu kinostudiyada keçib. Buna görə də kollektivimiz onu doğma məkanda təbrik etmək qərarına gəldi”. Qeyd olundu ki, aktrisa kinoda bir sıra maraqlı rollar yaradıb. Bu obrazlardan biri də “Dəli Kür” filmində Mələk obrazıdır. Müşfiq Hətəmov “Azərbaycanfilm”in kollektivi adından yubilyarı təbrik edərək ona hədiyyələr təqdim etdi.

Əməkdar artist Ənvər Həsənov, Əməkdar rəssam Rafiq Nəsirov, Əməkdar incəsənət xadimi, kino rəssamı Pərviz Quliyev və digərləri çıxış edərək yubilyarın ömür yolu və yaradıcılığından söz açdılar. Qeyd edildi ki, Zemfira Sadıqova 40-dan çox filmdə rol alıb. Bu filmlərdən “Bağ mövsümü” (1985), “Dantenin yubileyi” (1978), “Qətl günü” (1990) və başqalarını göstərmək olar.

Çıxış edənlər aktrisa ilə uzun illər birlikdə çalışdıqlarını diqqətə çatdıraraq bu illər ərzində yaddaqalan xatirələrini tədbir iştirakçıları ilə bölüşdülər. Bildirildi ki, Zemfira xanım təkcə aktrisa kimi deyil, qayğıkeş insan kimi də hər zaman kollektivlə birgə olub. Ona görə də səmimi dost və mehriban ana kimi hər zaman sevilir. Bu gün onun kinostudiyanın dəhlizində görünməsi belə gənc kadrlara ruh və sənət eşqi bəxş edir. Tədbirdə Zemfira xanımın həyat yoldaşı, unudulmaz aktyor, Xalq artisti Yusif Vəliyevin də xatirəsi anıldı.

Aktrisa ona göstərilən diqqət və qayğıya görə kinostudiyanın rəhbərliyinə təşəkkür etdi. İlk dəfə kinostudiyaya 1965-ci ildə qədəm qoyduğunu deyən aktrisa təxminən yarım əsr bu sənət məbədinin sakini olduğunu dilə gətirdi, bundan sonra da kinoda öz xidmətlərini əsirgəməyəcəyini bildirdi.

Lalə Azəri

Mədəniyyət. - 2014.- 16 iyul.- S. 4.