İçərişəhərdə “Avropa şəhərciyi”

Mayın 31-də İçərişəhərdə - Qoşa qala qapısı qarşısındakı meydanda Avropa İttifaqının (Aİ) Azərbaycandakı nümayəndəliyinin və quruma üzv ölkələrin Bakıdakı səfirliklərinin təşkilatçılığı ilə “Avropa şəhərciyi” (Eurovillage-2014) təşkil edildi.

Bu il ikinci dəfə təşkil edilən, rəngarəng sərgilər, musiqilər, rəqslər, uşaqlar üçün əyləncəli mərasimlərlə zəngin olan tədbir Avropa mədəniyyəti və Avropa İttifaqı diplomatik nümayəndəliklərinin Azərbaycandakı fəaliyyəti ilə yaxından tanış olmaq üçün gözəl fürsət idi.

Budəfəki “Avropa şəhərciyi”ndə Almaniya, Fransa, İtaliya, Böyük Britaniya, Niderland, İsveç, Rumıniya - ümumilikdə 18 ölkənin çadırları qurulmuşdu. Əvvəlcə festivalın rəsmi açılış mərasimi keçirildi. “İçərişəhər” Dövlət Tarix-Memarlıq Qoruğu İdarəsinin elmi-mədəni mərkəzinin direktor əvəzi Mikayıl Nəcəfov çıxış edərək artıq ikinci ildir gerçəkləşən tədbirin gözəl ənənəyə çevrildiyini söylədi: “Prezident İlham Əliyevin və ölkənin birinci xanımı Mehriban Əliyevanın İçərişəhərə xüsusi diqqət və qayğısı bu qədim tarixi-mədəni məkanda müxtəlif tədbirlərin təşkilinə zəmin yaradır. “Avropa şəhərciyi”ni keçirməkdə əsas məqsəd ittifaqa üzv ölkələrin mədəniyyətini və İçərişəhərin canlı tarix olduğunu nümayiş etdirməkdir”.

Avropa İttifaqının Azərbaycandakı nümayəndəliyinin rəhbəri Malena Mard tədbirin “İçərişəhər” Dövlət Tarix-Memarlıq Qoruğu İdarəsinin dəstəyi ilə keçirildiyini diqqətə çatdıraraq quruma təşəkkürünü bildirdi. Sonra qonaqlara festival haqqında məlumat verdi: “Avropa şəhərciyi” bizim Azərbaycan ictimaiyyətinə nümayiş etdirəcəyimiz böyük təcrübədir. Bu, Avropa İttifaqının Azərbaycandakı fəaliyyətini nümayiş etdirir. Ümidvarıq ki, bu tədbirlərlə Avropa İttifaqı və quruma üzv dövlətlər barədə Azərbaycanda məlumat daha da artacaq. Hər kəsi “Avropa şəhərciyi”ndə Avropanı görməyə, öyrənməyə, hiss etməyə, musiqi və rəqsləri dinləməyə, əylənməyə dəvət edirəm. Ziyarətçilər stendlərə yaxınlaşaraq Avropa İttifaqı və üzv ölkələr barədə məlumat ala və bu ölkələrin zəngin mədəniyyətləri ilə daha yaxından tanış ola bilərlər”.

Avropa İttifaqına üzv olan bir sıra ölkələrin Azərbaycandakı səfirləri və diplomatik nümayəndələri də tədbirə gələnləri salamladılar və Aİ-nın himni səsləndirildi.

Daha sonra iştirakçı ölkələr haqqında videoçaxrlar nümayiş olundu, musiqi və rəqslər təqdim edildi.

Meydanda qurulmuş çadırlardakı stendlərdə ayrı-ayrı ölkələr və onların Azərbaycandakı diplomatik nümayəndəliklərinin fəaliyyəti barədə təqdimatlar edilirdi. Bakı sakinləri və şəhərin qonaqları həmin çadırlara yaxınlaşaraq ölkələrin mədəniyyəti, tarixi, mətbəxi və milli xüsusiyyətləri barədə maraqlı məlumatlar alırdılar. Ziyarətçilərə ayrı-ayrı ölkələrdə təhsil imkanları haqqında kitablar, bukletlər, broşürlər və milli suvenirlər təqdim edilirdi. Tədbir intellektual-əyləncəli oyunlarla da müşayiət olunurdu.

Məsələn, ziyarətçilər məlumat köşklərindən “pasport” alaraq bütün ölkələrin stendlərinə yaxınlaşıb verilən sualları cavablandırmaqla “pasport”larına möhür vurdurur və həmin “pasport”ları məlumat köşklərinə qaytarır, əvəzində müxtəlif hədiyyə alırdılar. Face art, mükafatlı viktorinalar, karaoke də bu sıraya daxil idi. Viktorinada qalib gələn hər hansı ölkəyə səyahət etmək imkanı qazanırdı. Bundan başqa, festivalda Avropa mətbəxi, musiqi və teatr ifaları nümayiş olunurdu.

Axşam proqramında isə hər kəsi Avropa ifaçılarının maraqlı konsert proqramı - Hollandiyadan “Eurovision” mahnı müsabiqəsinin finalçısı Joan Franka, klassik musiqini müasir və maraqlı tərzi ilə ifadə edən xorvatiyalı violonçel ifaçısı Ana Rucner və Avropada bir çox mükafatlar almış pop-rok ifaçıları - Estoniyanın “Traffic” qrupunun çıxışı gözləyirdi.

Bir sözlə, qədim şəhərin köhnə divarları arasında qurulmuş müasir “Avropa şəhərciyi” maraqlı harmoniya yaratmışdı. Şəhər sakinləri ilə yanaşı, qonaqlar da bu harmoniyaya köklənərək birgünlük sanki bir Avropa sakini oldular. Tədbir maraqlı ab-havası və zəngin təəssüratı ilə yadda qaldı.

Mehparə

Mədəniyyət.- 2014.- 4 iyun.- S. 13.