Milli Qurtuluş Günü teatrlarda qeyd olunub

İyunun 14-də Azərbaycan Dövlət Musiqili Teatrında Milli Qurtuluş Günü münasibətilə yığıncaq keçirilib. Yığıncaqda çıxış edən teatrın direktoru, Əməkdar incəsənət xadimi Əliqismət Lalayev əlamətdar günün tarixindən, ulu öndər Heydər Əliyevin Azərbaycan dövlətçiliyinin qorunması və möhkəmləndirilməsi naminə xidmətlərindən bəhs edib. Teatrın ədəbi hissə müdiri, Əməkdar mədəniyyət işçisi Telli Pənahqızının Milli Qurtuluş Günü ilə əlaqədar məruzəsi dinlənilib. Xalq artistləri Afaq Bəşirqızı, İlham Namiq Kamal, gənc aktrisa Gültac Əlili ulu öndərin Azərbaycan mədəniyyətinə diqqət və qayğısından danışıblar.

* * *

Gənc Tamaşaçılar Teatrında Milli Qurtuluş Günü münasibətilə keçirilən tədbirdə teatrın direktoru, Əməkdar artist Mübariz Həmidov bu tarixin Azərbaycanın dövlətçilik və müstəqillik tarixində yerindən bəhs edib. Teatrın baş rejissoru, Əməkdar incəsənət xadimi Bəhram Osmanov, xalq artistləri - rejissor Cənnət Səlimova, aktyor Yasin Qarayev çıxış edərək ulu öndərin Azərbaycanın mədəniyyətinə, teatr sənətinə diqqət və qayğısından minnətdarlıqla söz açıblar.

Mədəniyyət.- 2014.- 18 iyun.- S. 4.